រូបភាពពីផ្កាយរណបដែលថតបានកាលពីពេលថ្មីៗនេះ បានបង្ហាញឲ្យឃើញថា ប្រទេសរុស្ស៊ី បានដាក់នាវាជាច្រើនគ្រឿង និងឧបករណ៍ការពារផ្សេងទៀត នៅជុំវិញស្ពានដ៏សំខាន់មួយ ដែលតភ្ជាប់វាទៅនឹងឧបទ្វីបគ្រីម៉េ។ កិច្ចខិតខំប្រឹងប្រែងនេះ ហាក់ដូចជាធ្វើឡើង ដើម្បីការពាររចនាសម្ព័ន្ធពីការវាយប្រហារដោយយានដ្រូនរបស់កងនាវាចម្បាំងរបស់អ៊ុយក្រែន។

ស្ពាន Kerch ជាសមិទ្ធិផលដ៏មានតម្លៃរបស់ប្រធានាធិបតីរុស្ស៊ី វ្ល៉ាឌីមៀ ពូទីន និងជានិមិត្តរូបនៃបំណងប្រាថ្នារបស់វិមានក្រឹមឡាំង ដើម្បីរក្សាការកាន់កាប់របស់ខ្លួននៅលើតំបន់គ្រីម៉េជារៀងរហូត បានធ្លាក់ខ្លួនជាជនរងគ្រោះនៃការវាយប្រហារកម្រិតខ្ពស់ជាបន្តបន្ទាប់របស់អ៊ុយក្រែន រួមទាំងការវាយប្រហារដោយយានដ្រូនរបស់កងទ័ពជើងទឹកផងដែរ។

កិច្ចខិតខំប្រឹងប្រែងកន្លងមក ដើម្បីការពារស្ពាននេះ មិនមានប្រសិទ្ធភាពទេ ហើយដោយសារអ៊ុយក្រែនបន្តបង្កើតថ្មីជាមួយនឹងកម្មវិធីយានដ្រូនរបស់កងទ័ពជើងទឹកដែលមានប្រសិទ្ធភាពខ្ពស់ របាំងការពារថ្មីរបស់    រុស្ស៊ី ប្រហែលជាមិនគ្រប់គ្រាន់ ដើម្បីទប់ស្កាត់ការវាយប្រហារបន្ថែមទៀតនោះទេ។

ក្រសួងការពារជាតិរបស់ចក្រភពអង់គ្លេស បាននិយាយនាពេលថ្មីៗនេះថា រុស្ស៊ី បានចាប់ផ្តើមដាក់ពង្រាយនាវា ធ្វើជារបាំងនៅផ្នែកខាងត្បូងនៃស្ពានប្រវែង ១២ម៉ាយ ដែលតភ្ជាប់រុស្ស៊ី និងតំបន់គ្រីម៉េ និងជួយសម្រួលដល់សកម្មភាពយោធា និងសេដ្ឋកិច្ចកាលពីដើមខែឧសភា។ រូបភាពផ្កាយរណបដែលថតបាននៅថ្ងៃទី ២៣ ខែឧសភា ហើយត្រូវបានបោះពុម្ពផ្សាយដោយរដ្ឋាភិបាលចក្រភពអង់គ្លេស បានបង្ហាញឲ្យឃើញនាវាជាច្រើនគ្រឿង នៅទីនោះ។