ប្រធានាធិបតីរ៉ូម៉ានី លោក Klaus Iohannis នៅថ្ងៃពុធ (ទី១៩ ខែមិថុនា) នេះ បាននិយាយថា លោកនឹងថ្លែងថា តើលោកនឹងត្រូវបន្តការប៉ុនប៉ង ដើម្បីក្លាយជាប្រមុខអង្គការណាតូ (NATO) បន្ទាប់ទៀតដែរ ឬយ៉ាងណា នៅក្នុងកិច្ចប្រជុំក្រុមប្រឹក្សាការពាររដ្ឋ នាថ្ងៃព្រហស្បតិ៍ (ទី២០ ខែមិថុនា) បន្ទាប់ពីនាយករដ្ឋមន្រ្តីហូឡង់លោក Mark Rutte ទទួលបានការគាំទ្រពីសមាជិករបស់សម្ព័ន្ធភាពស្ទើរទាំងអស់។

នៅឯសន្និសីទសារព័ត៌មាន បន្ទាប់ពីត្រូវបានសួរថា តើលោកនៅបន្តឈរឈ្មោះទៀត ឬយ៉ាងណា លោក Iohannis បានឆ្លើយថា៖ «ខ្ញុំនឹងបង្ហាញបញ្ហាទាំងនេះជាលើកដំបូងនៅក្នុងក្រុមប្រឹក្សាការពារកំពូល នៅថ្ងៃស្អែក ហើយបន្ទាប់ពីនោះ ខ្ញុំនឹងជូនដំណឹងដល់សាធារណជន។ ខ្ញុំធានាចំពោះអ្នកទាំងអស់គ្នាថា នៅរសៀលថ្ងៃស្អែក អ្នកនឹងទទួលដំណឹងយ៉ាងពេញលេញ»។

គួរបញ្ជាក់ថា នាយករដ្ឋមន្ត្រីហូឡង់ លោក Mark Rutte ដែលជាសម្ព័ន្ធមិត្តដ៏រឹងមាំរបស់ទីក្រុងគីវ និងជាអ្នករិះគន់ប្រធានាធិបតីរុស្ស៊ី លោក Vladimir Putin នឹងស្នងតំណែងលោក Jens Stoltenberg ជាប្រធានអង្គការណាតូ។ នេះបើយោងតាមការផ្សាយរបស់ទូរទស្សន៍ជាតិហូឡង់ NOS កាលពីថ្ងៃអង្គារ (ទី១៨ ខែមិថុនា) បន្ទាប់ពីប្រទេសហុងគ្រី និងស្លូវ៉ាគីបានគាំទ្ររូបលោក។

អង្គការណាតូត្រូវសម្រេចដោយឯកច្ឆន្ទ។ ដូច្នេះ បេក្ខជនរូបណាក៏ដោយ ត្រូវការការគាំទ្រពីសមាជិកសម្ព័ន្ធមិត្តទាំង ៣២ប្រទេស។ នាពេលនេះ មានតែប្រទេសរូម៉ានីប៉ុណ្ណោះ ដែលប្រធានាធិបតី លោក Iohannis កំពុងតែប្រជែងដណ្ដើមតួនាទីនេះ នៅតែប្រឆាំងជាផ្លូវការ ចំពោះបេក្ខភាពរបស់លោក Rutte៕