​ភ្នំពេញ៖ ជា​ការបំពេញតាមតម្រូវការ របស់ប្រជាពលរដ្ឋ ក្រសួង​ប្រៃសណីយ៍ បានប្រកាសជាផ្លូវការ ចាប់​ផ្ដើម​លក់ឧបករណ៍​តេស្តរហ័ស ជូនប្រជាពលរដ្ឋទូទៅ​ក្នុង​តម្លៃដើមដូច​ជា​ការ​លក់​ជូន​បណ្ដាក្រសួង ក្រុមហ៊ុន ស្ថាប័នផងដែរ។

ប្រជាពលរដ្ឋ ដែលមានតម្រូវការ អាច​ធ្វើការបញ្ជាទិញតាមប្រព័ន្ធអនឡាញរបស់ក្រសួង និង​អាច​មក​ទទួល​យកឧបករណ៍​តេស្ត​នៅក្រសួងដោយផ្ទាល់ ដោយពុំ​មាន​​កំណត់​លក្ខណ្ឌ​ណាមួយនោះទេ។

​ក្រសួងប្រៃសណីយ៍ និងទូរគមនាគមន៍នាថ្ងៃនេះ បានប្រកាសជាផ្លូវការ ដោយធ្វើការលក់ឧបករណ៍​តេស្តរ​ហ័ស ជូនប្រជាពលរដ្ឋទូទៅទាំងអស់ ដើម្បីប្រើ​ប្រា​ស់​​ធ្វើ​តេស្តសំ​ណាកដោយខ្លួនឯង ក្នុង​ការ​តាម​ដានសុខភាព។

កា​រលក់ជូនប្រជាពលរដ្ឋទូទៅ គឺលក់ក្នុងតម្លៃដើម ដោយប្រជាពលរដ្ឋអាច​ធ្វើការ​បញ្ជា​ទិញ​តាម​ប្រព័ន្ធ​អនឡាញ។ នេះជាការសម្រួលមួយ ស្របពេល​ដែល​ប្រជា​ពលរដ្ឋតាមផ្ទះជាច្រើន បាន​ស្វះ​ស្វែង​ទិញ​ឧបករណ៍តេស្តរហ័សតាមទីតាំងលក់ផ្សេងៗ ដែល​មានតម្លៃ​ថ្លៃលើស​ឧបករណ៍តេស្តដែល​ក្រសួង​លក់ជូន។

ចំពោះ​តម្លៃ​ឧបករណ៍តេស្តរហ័ស ដែលក្រសួងលក់ជូនទាំងបណ្ដាក្រសួងស្ថាប័ន និងប្រជាពល​រដ្ឋ​ទូទៅ គឺមានពីរតម្លៃផ្សេងគ្នាចំពោះឧបករណ៍​តេស្តរ​ហ័ស​ទាំង​ពីរប្រភេទដែលក្រសួងបាននាំចូល នឹងបន្តនាំចូលនាពេលខាងមុខ។

តម្លៃ​ដើម គឺ ៣,៧ ដុល្លារ​ក្នុងមួយឧបករណ៍តេស្ត សម្រាប់ឧបករណ៍តេស្តដែលផលិតនៅប្រទេស កូរ៉េ​ខា​​ងត្បូង ដែលមាននៅក្នុងស្តុកស្រាប់ រីឯឧបករណ៍តេស្ត​មួយ​ប្រភេទ​ទៀត គឺលក់ក្នុងតម្លៃ ២​ដុល្លារ​ក្នុងមួយឧបករណ៍ សម្រាប់តេស្តរហ័សផលិតនៅប្រទេស ចិន ដែលនឹងមកដល់ប្រ​ទេ​ស​កម្ពុជា​ក្នុងពេលឆាប់ៗ​ខាង​មុខ។

សម្រាប់ថ្ងៃនេះ លោក ស្រិល ស៊ីលិន ក៏បានបញ្ជាទិញឧបករណ៍តេស្តរហ័សចំនួន ពីរប្រអប់ ស្មើនឹង ៥០ឧបករណ៍តេស្តសម្រាប់ការប្រើប្រាស់លក្ខណៈ​គ្រួសារ​ក្នុង​ការតាមដានសុខភាព។ កា​រម​កទិញនេះ ក្រោយលោកទទួលបានដំណឹងភ្លាមៗ ពីការលក់ជូនសាធារណជន។ លោក​ថា ការ​ល​ក់ជូនដល់​ពល​រដ្ឋនេះ​ជារឿង​ប្រសើរព្រោះ​មាន​តម្លៃ​សមរ​ម្យ អាចការពារសុវត្ថិភាពគ្រួសាររបស់គាត់។

​នៅថ្ងៃដដែលនេះ ក៏មានបណ្ដាក្រុមហ៊ុនស្ថាប័ន មួយចំនួនបានមកទទួលឧបករណ៍តេស្តរហ័ស​នៅ​ក្រសួងផងដែរ។ កញ្ញា ងន ស្រីម៉ាច តំណាងអង្គការ មេ​ត្រី​អន្តរជាតិ ក៏បានទិញឧបករណ៍តេស្តរហ័សចំនួន ៩៥០ តេ​ស្ត ​សម្រាប់ការធ្វើតេសត្តជាប្រចាំជូនបុគ្គលិកផងដែរ។ កញ្ញាថា ការទិញនេះជាលើកទី៣ ហើយ​បាន​ជួយ​កាត់បន្ថយការចំណាយច្រើន បើធាបនឹងធ្វើការធ្វើតេស្តនៅខាងក្រៅ។​​ចំពោះឧបករណ៍តេស្តរហ័ស ក៏ត្រូវរក្សាទុកឱ្យបានត្រឹមត្រូវផងដែរ ដើម្បីថែរក្សាគុណភាព។ ការ​រក្សា​ទុក​ត្រឹមត្រូវគឺក្នុងសីតុណ្ហភាព ចន្លោះពី ២ទៅ ៣០​អង្សា​សេ​ និងមិនត្រូវដាក់ក្រោមកម្ដៅថ្ងៃ រឺកន្លែងកកនោះទេ។

តាមសារាចរណែនាំរបស់ក្រសួងសុខភិបាល កាលពីថ្ងៃទី ១០ ខែសីហាកន្លងទៅ មានចំណុចមួយ​បញ្ជាក់​ថា​ក្រសួងប្រៃសណី​យ៍នឹង​បន្តលក់​ឧបគរណ៍​តេស្ត​រហ័​ស​​ក្នុងរយៈពេល ២ ខែទៀត ដើម្បីឱ្យមានភាពសម្បូរ និងបន្សាំទៅនឹងតម្លៃទីផ្សារ។ បន្ទាប់មកក្រសួងនឹងផ្ទេរការងារនេះ ទៅអោយអង្គភាពណាមួយទទួលខុសត្រូវបន្ត រឺទុក​លទ្ធ​ភាព​ឱ្យក្រុមហ៊ុនធ្វើអាជីវកម្មក្នុងតម្លៃសមស្រប៕

អត្ថបទ៖គឹមហុក ​