ភ្នំពេញ៖ ឯកឧត្តម កត្តា អ៊ន រដ្ឋលេខាធិការ និងជាអ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈ នៅថ្ងៃទី១៩ ខែមិថុនា ឆ្នាំ២០២៤នេះ បានលើកឡើងថា ការប្រើពាក្យសហជីពឯករាជ្យ ឬសហជីពក្លែងក្លាយ គឺជាការញ៉ុះញុង បំបែកបំបាក់ បង្កើតការរើសអើងសហជីព និងអង្គការវិជ្ជាជីវៈនៅកម្ពុជា។ 

ឯកឧត្តម រដ្ឋលេខាធិការ បានលើកជាសំណួរថា «សហជីពធ្វើការតវ៉ាប្រឆាំងរដ្ឋាភិបាល ទើបហៅថាសហជីពឯករាជ្យឬ? សហជីពការពារផលប្រយោជន៍កម្មករនិយោជិតពិតប្រាកដជាសហជីពក្លែងក្លាយឬ?» 

ឯកឧត្តមបានគូសបញ្ជាក់បន្ថែមថា នៅកម្ពុជាសព្វថ្ងៃ មានសហជីព និងអង្គការវិជ្ជាជីវៈជាង ៦,៣០០ កំពុងដំណើរការការងាររបស់ខ្លួនដោយសេរី និងគ្មានការរិតត្បិត ឬបំផិតបំភ័យដូចការលើកឡើងដោយសារព័ត៌មាន សហជីព និងអង្គការសង្គមស៊ីវិលមួយចំនួននោះឡើយ។ ឯកឧត្តម បានបន្តទៀតថា សហជីព និងអង្គការវិជ្ជាជីវៈត្រូវបានចុះបញ្ជីត្រឹមត្រូវតាមនីតិវិធី និងបានតម្កល់លក្ខន្តិកៈរបស់ខ្លួននៅក្រសួងការងារ និងបណ្តុះបណ្តាលវិជ្ជាជីវៈ។ ក្នុងលក្ខន្តិកៈរបស់ពួកគេ បានប្រកាសពីជំហរបម្រើផលប្រយោជន៍កម្មករនិយោជិត សុខដុមរមនាក្នុងទំនាក់ទំនងវិជ្ជាជីវៈ មិនចូលរួមធ្វើនយោបាយ ឬសកម្មភាពនយោបាយណាមួយឡើយ។

ឯកឧត្តម កត្តា អ៊ន បានបន្ថែមថា សហជីព និងអង្គការសង្គមស៊ីវិលមួយចំនួន ដែលតាំងខ្លួនជាឯករាជ្យ ខ្លះមានភ្ជាប់ឈ្មោះថាឯករាជ្យ តែធ្វើសកម្មភាពមិនឯករាជ្យ។ មិនឯករាជ្យដោយសកម្មភាពរបស់ខ្លួនមិនបម្រើផលប្រយោជន៍កម្មករនិយោជិត ពេលខ្លះធ្វើការតវ៉ាក្នុងទ្រង់ទ្រាយបាតុកម្មខុសច្បាប់ បំពានច្បាប់ បង្កចលាចល អនាធិបតេយ្យ និងអំពើហឹង្សា។ 

ឯកឧត្តមបានចោទសួរថា តើនេះទើបហៅថា លំហសេរីភាពសហជីពក្នុងសង្គមប្រជាធិបតេយ្យឬ? តើសហជីពដែលធ្វើការតវ៉ា ធ្វើបាតុកម្មខុសច្បាប់ ទើបហៅថាសហជីពឯករាជ្យឬ? សហជីពដែលបានគោរពច្បាប់ នីតិវិធីច្បាប់ និងធ្វើការតវ៉ាស្របច្បាប់ ទាមទារយុត្តិធ៌ម ភាពត្រឹមត្រូវ កិត្តិយស សេចក្តីថ្លៃថ្នូររបស់សហជីព កម្មករនិយោជិត និងផលប្រយោជន៍សហជីព និងកម្មករនិយោជិត ជាសហជីពក្លែងក្លាយឬ? ការអនុវត្តច្បាប់ប្រឆាំងជនល្មើស ឬនិតិបុគ្គលដែលប្រព្រឹត្តល្មើសច្បាប់ដោយអាជ្ញាធរមានសមត្ថកិច្ច ជាការធានាយុត្តិធម៌សង្គម សមភាព និងនីតិរដ្ឋ។ 

ឯកឧត្តម លើកឡើងថា ការអនុវត្តច្បាប់គ្មានគោលការណ៍ស្តង់ដារពីរនោះឡើយ។ ជនណាក៏ដោយដែលប្រព្រឹត្តល្មើសច្បាប់ត្រូវទទួលទោសតាមច្បាប់។ សកម្មជនសហជីព ឬអង្គការសង្គមស៊ីវិល ដែលប្រព្រឹត្តល្មើសច្បាប់ ដែលជាបទល្មើសមានចែងក្នុងក្រមព្រហ្មទណ្ឌ ត្រូវទទួលខុសត្រូវចំពោះមុខច្បាប់។ ការអនុវត្តច្បាប់នេះ មិនមែនជាការរិតត្បិតសេរីភាពសហជីព ឬអង្គការសង្គមស៊ីវិលនោះទេ ផ្ទុយទៅវិញជាការធានាសន្តិសុខ សណ្តាប់ធ្នាប់សាធារណៈ ផលប្រយោជន៍សាធារណៈ និងសមភាពនៃសិទ្ធិ។ 

ទន្ទឹមនឹងនេះ ឯកឧត្តមរដ្ឋលេខាធិការបញ្ជាក់ថា ការការពារជនល្មើសដែលប្រព្រឹត្តល្មើសច្បាប់ រារាំងការអនុវត្តច្បាប់ ជាការលើកទឹកចិត្តឱ្យមនុស្សប្រព្រឹត្តបទល្មើសក្នុងសង្គម។ប្រជាពលរដ្ឋគ្រប់រូបត្រូវគោរពច្បាប់ គោរពសិទ្ធិ និងផលប្រយោជន៍សាធារណៈ ដើម្បីលិទ្ធិប្រជាធិបតេយ្យ និងនីតិរដ្ឋ។ ការប្រើប្រាស់សិទ្ធិសេរីភាពត្រូវមានព្រំដែន គឺមិនត្រូវរំលោភបំពានច្បាប់ និងសិទ្ធិសេរីភាព កិត្តិយស និងសេចក្តីថ្លៃថ្នូររបស់អ្នកដទៃឡើយ៕ ដោយ ៖ បូរ៉ាវី