ក្នុងសម្លៀកបំពាក់ពណ៌ស ប្រជាជនដែលភៀសខ្លួនចេញពីអំពើហឹង្សា ពីទីក្រុង Tila ភាគខាងត្បូងប្រទេសម៉ិកស៊ិក បានចេញធ្វើបាតុកម្ម កាលពីថ្ងៃពុធ ដើម្បីទាមទារឱ្យរដ្ឋាភិបាល អនុញ្ញាតឱ្យពួកគេ បានត្រឡប់ទៅលំនៅឋានវិញដោយសុវត្ថិភាព។

ដោយមានកាន់ស្លាកសញ្ញា និងប៉ោងប៉ោងជាមួយសារនៃសន្តិភាព និងយុត្តិធម៌ អ្នកស្រុក Tila បានដើរកាត់តាមដងផ្លូវ Yajalon ជាកន្លែងដែលបច្ចុប្បន្ន ពួកគេកំពុងជ្រកកោន។

សាក្សី បានប្រាប់សារព័ត៌មានរ៉យទ័រថា កាលពីយប់ថ្ងៃទី៤ ខែមិថុនា ជនប្រដាប់អាវុធជាច្រើននាក់ បានមកដល់តាមរថយន្ត នៅក្នុងទីក្រុង Tila ហើយបានចាប់ផ្តើមបាញ់ប្រហារទៅលើលំនៅឋាន និងផ្ទះអាជីវកម្ម ព្រមទាំងបានដុតអគារជាច្រើន។

អំពើហិង្សានៅក្រុងTila បានអូសបន្លាយពេល៣បីថ្ងៃ រហូតដល់ថ្ងៃទី៧ មិថុនា ទើបកងទ័ពបានមក ដល់។ អ្នកស្រុកTila ទាំងអស់ប្រហែលជា៤.០០០នាក់ បានភៀសខ្លួនចេញពីលំនៅឋាន ដោយពុំមានយកអ្វីទៅតាមខ្លួន ក្រៅពីសម្លៀកបំពាក់មួយចំនួនទៅជាមួយ។

ប្រជាជន និយាយថា អំពើហិង្សាបានកើនឡើងក្នុងប៉ុន្មានឆ្នាំចុងក្រោយនេះ រួមជាមួយការជួញដូរគ្រឿងញៀន និងការជំរិតទារប្រាក់។