បាល់ទាត់៖ ការប្រកួតពានរង្វាន់មិត្តហ្វូមខេមបូឌានលីគ អាចនឹងដំណើរការប្រកួតឡើងវិញនាដើមខែកញ្ញាខាងមុខ បន្ទាប់ពីផ្អាកការប្រកួតមួយរយៈដោយសារវិបត្តិកូវីដ-១៩ ពិសេសការផ្ទុះនូវជំងឺកូវីដបំប្លែងថ្មីប្រភេទដែលតា (Delta) កាលពីថ្មីៗ។ អ្វីដែលពិសេសការប្រកួតនៅជុំទី២ អាចនឹងផ្លាស់ប្ដូររូបមន្ដថ្មីទៀតហើយ។
ប្រភពពីគណៈកម្មការរៀបចំការប្រកួតបានឲ្យដឹងថា លីគអាចនឹងបន្ដការប្រកួតវិញនាដើមខែកញ្ញា ប្រសិនបើស្ថានភាពជំងឺកូវីដធូស្រាល។ ចំពោះព័ត៌មាននៃការផ្លាស់ប្ដូររូបមន្ដប្រកួតនៅជុំទី២ វិញ គណៈកម្មការប្រកួតបាល់ទាត់ជាតិកម្ពុជា និងបណ្ដាក្លិបជាសមាជិកបានជជែកគ្នារួចហើយ តែពុំទាន់មានការសម្រេចជាផ្លូវការនោះទេ។ ប្រភពដដែលបានបញ្ជាក់ថា រូបមន្ដថ្មី ដែលត្រូវបានជជែកសម្រាប់ត្រៀមផ្លាស់ប្ដូរនៅជុំទី២ គឺការប្រកួត Top-8 និង 5 Bottom ដែលមានន័យថា ក្រុមឈរលេខ១ ដល់លេខ៨ នៃការប្រកួតជុំទី១ នឹងត្រូវជ្រើសរើសជាបេក្ខភាពបន្ដការប្រកួតជុំទី២ ដើម្បីប្រជែងជើងឯក ខណៈក្រុមឈរលេខ៩ ដល់លេខ១៣ នឹងត្រូវប្រកួតដណ្ដើមចំណាត់ថ្នាក់ល្អ ខណៈក្រុមឈរបាត់តារាងនឹងត្រូវកាត់ចេញទៅលេងលីគទី២។ បើតាមការអះអាង ផែនការផ្លាស់ប្ដូររូបមន្ដថ្មីក្នុងបរិបទកូវីដ-១៩ ផ្ទុយពីរូបមន្ដជុំទី២ កាលពីឆ្នាំ២០២០ ដែលលេងរូបមន្ដ Top-6 និង 7 Bottom នេះ ក៏ព្រោះលីគឆ្នាំនេះមានការប្រកួតប្រជែងខ្លាំង ហើយក្រុមនីមួយៗសុទ្ធសឹងតែមានសមត្ថភាពខ្ពស់។
ដូច្នេះដើម្បីបង្កើនការប្រកួតឲ្យបានច្រើន ទើបគណៈកម្មការរៀបចំការប្រកួត និងបណ្ដាក្លិបសមាជិកជជែកពីការផ្លាស់ប្ដូររូបមន្ដប្រកួតថ្មីនេះតែម្ដង។ សូមបញ្ជាក់ថា លីគកំពូលកម្ពុជា បានដំណើរការប្រកួតចំនួន ១១សប្ដាហ៍មកហើយមុនផ្អាកជាបណ្ដោះអាសន្ន ស្របតាមគោលការណ៍ណែនាំរបស់រាជរដ្ឋាភិបាល ដើម្បីចូលរួមប្រយុទ្ធប្រឆាំងជំងឺកូវីដ-១៩។ ចំពោះលទ្ធផលបណ្ដោះអាសន្ន គេឃើញក្រុមឈរ Top-8 កំពុងមានការប្រកួតប្រជែងខ្លាំង ពិសេសក្រុមលំដាប់កំពូលតារាងដោយវិសាខាឈរលេខ១ មាន ២២ពិន្ទុ ខណៈបឹងកេតឈរលេខ២ មាន ២១ពិន្ទុ, ក្រុមអង្គរថាយហ្គឺរឈរលេខ៣ មាន ២០ពិន្ទុ គ្រាដែលក្រុមព្រះខ័នរាជស្វាយរៀង និងណាហ្គាវើលដ៏មាន ១៩ពិន្ទុស្មើគ្នាឈរលេខ៤ និងលេខ៥៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
