អ្នកនាំពាក្យម្នាក់បាននិយាយកាលពីថ្ងៃពុធ (១៩ មិថុនា) ថា គណៈកម្មការអឺរ៉ុប នឹងដាក់ពន្ធលើការនាំចូលស៊ុតរបស់អ៊ុយក្រែន ទៅក្នុងសហភាពអឺរ៉ុប ក្នុងរយៈពេលពីរសប្តាហ៍ខាងមុខ បន្ទាប់ពីកម្រិតដែលបានព្រមព្រៀងគ្នាកាលពីមុនសម្រាប់ការនាំចូលទាំងនោះត្រូវបានឈានដល់។

សហភាពអឺរ៉ុប បានកម្រិតដែនកំណត់សម្រាប់ការនាំចូលកសិកម្មមួយចំនួនពីអ៊ុយក្រែន បន្ទាប់ពីការទទួលបានពាណិជ្ជកម្មសេរីដែលត្រូវបានផ្តល់ដើម្បីជួយដល់សេដ្ឋកិច្ចប្រទេសនេះ បន្ទាប់ពីប្រតិបត្តិការយោធារុស្ស៊ីក្នុងឆ្នាំ២០២២ ហើយបានធ្វើឱ្យកសិករនៅក្នុងសហភាពអឺរ៉ុបខឹងសម្បារ និងបានរួមចំណែកដល់រលកនៃការតវ៉ានៅតាមជនបទជាច្រើននៅឆ្នាំនេះ។

ទិន្នន័យរបស់សហភាពអឺរ៉ុបបានបង្ហាញថា ចំពោះស៊ុត ការនាំចូលរបស់សហភាពអឺរ៉ុប បានកើនឡើងចំនួនបីភាគបួនកាលពីឆ្នាំមុន ហើយបានបន្តកើនឡើងនៅដើមឆ្នាំនេះ ដោយមានអ៊ុយក្រែនជាអ្នកផ្គត់ផ្គង់នាំមុខគេ។ឧស្សាហកម្មស៊ុតនៅអឺរ៉ុប បានត្អូញត្អែរថាលំហូរនៃការផ្គត់ផ្គង់របស់អ៊ុយក្រែន ដែលមានតំលៃថោកបានរារាំងការស្ទុះងើបឡើងវិញនៃទិន្នផលពីការផ្ទុះជំងឺផ្តាសាយបក្សីក្នុងប៉ុន្មានឆ្នាំថ្មីៗនេះ។

ការទប់ស្កាត់របស់សហភាពអឺរ៉ុប លើការនាំចូលកសិកម្មពីអ៊ុយក្រែនក៏គ្របដណ្តប់លើសាច់បក្សី ស្ករ ក្រមួន ពោត និងទឹកឃ្មុំផងដែរ។ គួរលឹកផងដែរថា កាលពីដើមឆ្នាំនេះ ក្រុមកសិករបាននាំគ្នាតវ៉ាបិទផ្លូវជាច្រើនសប្តាហ៍នៅក្នុងប្រទេសនានាទូទាំងសហភាពអឺរ៉ុប ដោយនិយាយថាពួកគេកំពុងប្រឈមមុខនឹងកំណើនថ្លៃចំណាយ និងពន្ធខ្ពស់ សេវាលុយក្រោមតុ បទប្បញ្ញត្តិបរិស្ថានហួសហេតុ និងការប្រកួតប្រជែងមិនយុត្តិធម៌ពីការនាំចូលអាហារថោក ជាពិសេសពីអ៊ុយក្រែន៕