ថ្ងៃ២០ មិថុនា ឆ្នាំ ១៩៧៧ ជាថ្ងៃប្រវត្តិសាស្ត្រសម្រាប់កម្ពុជា ជាថ្ងៃចាប់ផ្ដើម​ឆ្ពោះទៅ​ការ​ផ្ដួល​រំលំ​របប​ប្រល័យពូជសាសន៍ខ្មែរក្រហម។ ថ្ងៃប្រវត្តិសាស្ត្រនេះ ជាការចាកចេញពីមាតុភូមិ ដោយ​យក​អាយុ​ជីវិត​ជាដើមទុន របស់សម្ដេចតេជោ ហ៊ុន សែន និងសមមិត្ត ៥រូបផ្សេងទៀត ដើម្បី​ទៅ​ស្វែង​រក​ជំនួយ​ពីប្រទេស វៀតណាម មករំដោះកម្ពុជាចេញពីរបបប្រល័យពូជសាសន៍។ ព្រឹត្តិការណ៍​ប្រវត្តិសាស្ត្រ​នេះ ត្រូវបានយុវជន មើលឃើញថា ជាគំរូវីរៈភាព​ដ៏ធំធេង​សម្រាប់​ប្រទេស​ជាតិ​កម្ពុជា​ទាំងមូល​។

ថ្ងៃទី២០ មិថុនា ឆ្នាំ ២០២៤នេះ ជាគម្រប់ខួប ៤៧ឆ្នាំ នៃព្រឹត្តិការណ៍ប្រវត្តិសាស្ត្ររបស់កម្ពុជា ដែល​​ជា​ចំណុចចាប់ផ្ដើមឆ្ពោះទៅការផ្ដួលរំលំរបបប្រល័យពូជសាសន៍ខ្មែរក្រហម។ ព្រឹត្តិការណ៍​សំខាន់ ដែលបានកើតឡើងនៅ ៤៧ឆ្នាំមុននោះ ជាការយកជីវិតធ្វើជាដើមទុន របស់ យុវជន ហ៊ុន សែន និងសមមិត្ត ៥រូបផ្សេងទៀត ចាកចេញពីកម្ពុជា ទៅស្វែងរកជំនួយពីប្រទេស វៀតណាម ដើម្បី​រំដោះប្រជាជនកម្ពុជា ចេញពីរបបប្រល័យពូជសាសន៍ខ្មែរក្រហម។

ព្រឹត្តិការណ៍​ប្រវត្តិសាស្ត្រនេះ ត្រូវបានយុវជនក្នុងសង្គមសន្តិភាពបច្ចុប្បន្ន មើលឃើញថា ជាគំរូវីរៈ​ភាព​ដ៏ធំធេងរបស់សម្ដេចតេជោ និងសមមិត្តស្មោះស្ម័គ្ររបស់លោក។ ការចាត់ទុកជាគំរូ វីរភាព​ដ៏​ធំធេងនេះ ដោយសារពួកគេមើលឃើញថា សម្ដេច ហ៊ុន សែន និងសមមិត្ត មានទឹកចិត្តមុះមុត គិត​ប្រយោជន៍ជាតិជាធំ ហ៊ានប្រថុយជីវិតដើម្បីស្វែងរកជំនួយចេញពី របបខ្មៅងងឹត ប៉ុល ពត។ ក្រុម​យុវជន មើលឃើញដែរថា បើសិនជាគ្មានព្រឹត្តិការណ៍ប្រវត្តិសាស្ត្រ ថ្ងៃទី ២០ មិថុនា ឆ្នាំ ១៩៧៧​នោះទេ ច្បាស់ជាមិនមានដំណាក់កាលបន្ទាប់ៗ និងគ្មានថ្ងៃជ័យជំនះ ៧ មករា ឆ្នាំ ១៩៧៩នោះទេ។

ក្រុមយុវជនជាអ្នកទទួលផលពីសង្គមមានសុខសន្តិភាព ជាអ្នកបន្តវេននាពេលអនាគត ពួក​គេ​ដឹង​ច្បាស់​ពី​កាតព្វកិច្ចរបស់ខ្លួន។ កាតព្វកិច្ចរបស់ពួកគេ គឺការថែរក្សាសុខសន្តិភាព ការអភិវឌ្ឍន៍ ដែល​កម្ពុជាទទួលបានដោយលំបាកពីការពលីរបស់យុវជនជំនាន់មុន។ ភ្ជាប់ជា​មួយ​ការ​ថែ​រក្សា​សុខ​សន្តិភាព គឺជាការអភិវឌ្ឍន៍ខ្លួនធ្វើខ្លួនជាធនធានមានសមត្ថភាព សម្រាប់សង្គមជាតិ ចូល​រួម​អភិវឌ្ឍ​ជាតិ​ឱ្យកាន់តែរីកចម្រើន។

គួររម្លឹកឱ្យដឹងថា ព្រឹត្តិការណ៍ថ្ងៃទី ២០ មិថុនា ឆ្នាំ ១៩៧៧ ជាការចាកចេញទៅស្វែងរកជំនួយ​រំដោះ​ប្រទេសរបស់សមមិត្ត ហ៊ុន សែន សមមិត្ត នុច ថន សមមិត្ត ញឹក ហួន សមមិត្ត វ៉ា ប៉ោអ៊ាន និង សមមិត្ត ស៊ូ គីម ស្រ៊ាង (ហៅសាញ់)។ ឥស្សរជនទាំង៥នាក់ បានសម្រេច​ចិត្ត​ធ្វើ​ដំណើរ​រួម​គ្នាទាំ​ងយប់ចេញពីតំបន់មួយក្នុងស្រុកមេមត់ ខេត្តត្បូងឃ្មុំ ឆ្ពោះទៅ​ទិសខាង​កើត​ដើម្បី​ស្វែង​រក​ជំនួយ​មក​រំដោះប្រជាជនកម្ពុជា ពីរបបប្រល័យពូជសាសន៍ ប៉ុល ពត៕ អត្ថបទ៖ គឹម ហុក