​អា​ហ្វ​ហ្គា​នី​ស្ថាន៖ សាក្សី​បាន​និយាយ​កាលពី​ថ្ងៃ​អង្គា​រថា​ ជនជាតិ​អា​ហ្វ​ហ្គា​នី​ស្ថាន​រាប់​រយ​នាក់​រួម​ទាំង​ស្ត្រី​ និង​កុមារ​បាន​ឆ្លង​ព្រំដែន​ចូល​ទៅ​ក្នុង​ព្រំដែន​ប៉ា​គី​ស្ថាន ​ក្នុង​រយៈពេល ២៤​ម៉ោង​ចុង​ក្រោយនេះ​។​

​យ៉ាងហោចណាស់​មនុស្ស​ ២នាក់​ក្នុងចំណោម​ជនជាតិ​អា​ហ្វ​ហ្គា​នី​ស្ថាន​ដែល​ឆ្លងដែន​ចូល​ទៅ​ក្នុងទីក្រុង ​Chaman គឺជា​អ្នកទោស​ដែល​ទើប​ត្រូវ​បាន​ដោះលែង​ពី​ពន្ធនាគារ Pul-e-Charkhi និង Bagram ដោយ​ពួក​តា​លី​បង់​។ គេ​មិន​ច្បាស់​ទេ​ថា​ តើ​អ្នកទោស​រូប​នេះ​ត្រូវ​បាន​រដ្ឋាភិបាល​អា​ហ្វ​ហ្គា​នី​ស្ថាន​ចាប់ខ្លួន​ ពី​បទ​ចោទប្រកាន់​អ្វី​នោះ​ទេ។​ ​លោក Abdul Qadoos ប្រាប់​ទីភ្នាក់ងារសារព័ត៌មាន​ AP ថា​ លោក​ត្រូវ​បាន​គេ​ឃុំ​រយៈពេល ៦​ឆ្នាំ​នៅ​ក្នុង​ពន្ធនាគារ Pul-e-Charkhi មុន​ពេល​ក្រុម​តា​លី​បង់​ដោះលែង​រូបលោក​។​ ​លោក​មិនបាន​ចែករំលែក​ព័ត៌មាន​លម្អិត​បន្ថែម​ទេ ​ហើយ​មិនបាន​និយាយ​ថា​ តើ​លោក​បាន​ចេញពី​ប៉ា​គី​ស្ថាន​ទៅ​អា​ហ្វ​ហ្គា​នី​ស្ថាន ដើម្បី​គាំទ្រ​ក្រុម​តា​លី​បង់​ ឬ​យ៉ាងណា​។​ ទោះ​យ៉ាង​ណា​សាច់ញាតិ​របស់​លោក​ដែល​ស្វាគមន៍​លោក ​នៅ​ពេល​ទៅដល់​ព្រំដែន​ទីក្រុង Chaman កំពុង​គ្រវី​ទង់​ក្រុម​តា​លី​បង់​។​

​មនុស្ស​ជាច្រើន​បាន​ធ្វើ​ដំណើរ​ជាមួយ​សាច់ញាតិ​វ័យ​ចំណាស់​ ឬ​អ្នក​ផ្សេង​ទៀត​ដែល​ត្រូវការ​ការ​ព្យាបាល​ជាបន្ទាន់ ត្អូញត្អែរ​ពី​ការ​កង្វះខាត​មណ្ឌល​សុខភាព​ នៅ​តាម​ព្រំដែន​អា​ហ្វ​ហ្គា​នី​ស្ថាន​។​ ​អ្នកដំណើរ​ និង​អាជ្ញាធរ​អា​ហ្វ​ហ្គា​នី​ស្ថាន​បាន​ប្រាប់​ទូរទស្សន៍ Al Jazeera ថា កាលពី​ថ្ងៃ​អង្គារ​ព្រំដែន​នៅតែ​បើកចំហ​ សម្រាប់​ជនជាតិ​អា​ហ្វ​ហ្គា​នី​ស្ថាន​ទាំងអស់​ដែល​មាន​ឯកសារ ​អត្តសញ្ញាណ​អា​ហ្វ​ហ្គា​នី​ស្ថាន​ត្រឹមត្រូវ ឬ​ភស្តុតាង​នៃ​ការ​ចុះ​ឈ្មោះ​ជា​ជនភៀសខ្លួន​អា​ហ្វ​ហ្គា​នី​ស្ថាន​នៅ​ប៉ា​គី​ស្ថាន​៕

អត្ថបទ៖ សុខមាន