អ្នកនយោបាយហ្វាំងឡង់កាលពីថ្ងៃពុធ បានអំពាវនាវឲ្យមានវិធានការប្រឆាំងនឹងការរើសអើងជាតិសាសន៍បន្ថែមទៀត ដើម្បីការពារការកើតឡើងម្តងទៀតនៃការវាយប្រហារនាពេលថ្មីៗនេះលើបុគ្គលពីរនាក់ ដែលមានប្រវត្តិជាជនអន្តោប្រវេសន៍ នៅក្នុងទីក្រុងOulu ភាគខាងជើង។

លោក ប្រធានាធិបតី Alexander Stubb បាននិយាយទៅកាន់ប្រព័ន្ធផ្សព្វផ្សាយសង្គមថា គ្មានកន្លែងសម្រាប់ការរើសអើងជាតិសាសន៍ នៅក្នុងប្រទេសហ្វាំងឡង់ទេ ហើយថា មនុស្សគ្រប់រូបមានសិទ្ធិមានអារម្មណ៍ថា មានសុវត្ថិភាព។ លោកនាយករដ្ឋមន្ត្រី Petteri Orpo បានពណ៌នាព្រឹត្តិការណ៍នៅទីក្រុង Oulu និង«ការហេតុផលជំរុញការរើសអើងជាតិសាសន៍»របស់ពួកគេថា គួរឲ្យស្អប់ខ្ពើមបំផុត។

លោក Antti Lindtman ប្រធានគណបក្សប្រឆាំងដ៏ធំបំផុតគឺ សង្គមប្រជាធិបតេយ្យ បាននិយាយថា ការអត់ឱនមិនគ្រប់គ្រាន់ គឺមិនគ្រប់គ្រាន់ទេ ដោយសង្កត់ធ្ងន់ថា «ការនិទានរឿងអំពីការរើសអើងពូជសាសន៍ គួរតែត្រូវបានលុបចោល រួមទាំងការប្រើពាក្យសម្តីលាក់លៀម និងការនិយាយបញ្ឆិតបញ្ឈៀង»។

កាលពីថ្ងៃចន្ទ លោក Sebastian Lamsa អាយុ ៣៣ឆ្នាំ ជាបុរសដែលមានការគាំទ្រខាងស្ដាំនិយម ត្រូវបានឃុំខ្លួនក្នុងមន្ទីរឃុំឃាំង ដោយសង្ស័យថា បានចាក់ និងធ្វើឲ្យកុមារអាយុ ១២ឆ្នាំរងរបួសយ៉ាងធ្ងន់ធ្ងរនៅឯមជ្ឈមណ្ឌលផ្សារទំនើប Valkea កាលពីថ្ងៃព្រហស្បតិ៍សប្តាហ៍មុន។ កាលពីថ្ងៃអង្គារ នៅក្នុងផ្សារទំនើបដដែលនោះ ក្មេងជំទង់ម្នាក់ បានចាក់ឲ្យរបួសជនអន្តោប្រវេសន៍អាស៊ីអាយុ ២៦ ឆ្នាំម្នាក់ នៅពេលធ្វើដំណើរពីកន្លែងធ្វើការមកផ្ទះ។ ជនរងគ្រោះនេះ បានទៅរស់នៅប្រទេសហ្វាំងឡង់រយៈពេលមួយឆ្នាំហើយ។ ជនរងគ្រោះទាំងពីរនាក់ បានរួចជីវិតពីការវាយប្រហារទាំងនោះ។