នាយទាហាន និងពលទាហាននៃកងពលតូចលេខ៧០ ប្តេជ្ញានឹងយកវីរៈភាពរបស់សម្តេចតេជោ ហ៊ុន សែន ដែលបានតស៊ូក្នុងដំណើរឆ្ពោះទៅរកការសង្គ្រោះជាតិឆ្នាំ១៩៧៧ ជាគំរូភាពរបស់ខ្លួនដើម្បីការពារជាតិ និងប្រជាជន។
ថ្លែងប្រាប់BTV នៅថ្ងៃទី១៩ ខែមិថុនា ឆ្នាំ២០២៤ ទាក់ទងនឹងដំណើរឆ្ពោះទៅកាន់ការផ្តួលរំលំរបបប្រល័យពូជសាសន៍របស់សមមិត្ត ហ៊ុន សែន និងយុទ្ធមិត្តចំនួនបួនរូបទៀតកាលពីជាង៤០ឆ្នាំមុននោះ មាននាយទាហាន ពលទាហាននៃកងពលតូចលេខ៧០ បានលើកឡើងថា ពួកគេពិតជាមានការស្ងប់ស្ងែងយ៉ាងខ្លាំង ចំពោះវីរភាពដ៏ក្លាហានរបស់សម្តេចតេជោ ហ៊ុន សែន ដែលបានលះបង់ប្រពន្ធកូនជាទីស្រលាញ់ បូជាសាច់ ស្រស់ឈាមស្រស់ដើម្បីជាតិមាតុភូមិ កាលពីថ្ងៃទី២០ ខែមិថុនា ឆ្នាំ១៩៧៧ ខណៈដំណើរដ៏គ្រោះថ្នាក់បំផុតនេះ គឺធ្វើឡើងដើម្បីរំដោះប្រជាជនកម្ពុជាឲ្យរួចផុតពីការកាប់សម្លាញ់យ៉ាងព្រៃផ្សៃពីសំណាក់របប ប៉ុល ពតនោះ។ នាយទាហាន ពលទាហាន លើកឡើងថា ការតស៊ូដ៏មានអត្ថន័យ និងតម្លៃនេះ ពួកគេនឹងយកវីរភាពបស់សម្តេចតេជោ ហ៊ុន សែន ជាគំរូសម្រាប់ជាស្មារតីអនុវត្តតួនាទី និងភារកិច្ចរបស់ខ្លួន ក្នុងការការពារជាតិ សាសនា ព្រះមហាក្សត្រ និងប្រជាជន។
គួររំលឹកថា នៅថ្ងៃទី២០ ខែមិថុនា ឆ្នាំ២០២៤ នេះគឺជាខួបគម្រប់ ៤៧ឆ្នាំ នៃដំណើរតស៊ូឆ្ពោះទៅរកការរំដោះជាតិរបស់សម្តេចតេជោ ហ៊ុន សែន និងយុទ្ធមិត្ត ដើម្បីរំដោះជាតិ និងប្រជាជនកម្ពុជាចេញពីការកាប់សម្លាប់របស់ខ្មែរក្រហម។ ថ្ងៃទី២០ ខែមិថុនា ឆ្នាំ១៩៧៧ ជាពេលដែលសមមិត្ត ហ៊ុន សែន ក្នុងវ័យ ២៥ឆ្នាំ រួមនឹងយុទ្ធមិត្តដ៏ស្ម័គ្រស្មោះ៤រូបផ្សេងទៀត បានសម្រេចចិត្តក្នុងស្ថានភាពដ៏តាន់តឹងបំផុតលាចាកទឹកដី លាចាកឧត្តមភរិយា និងកូនក្នុងផ្ទៃជាទីស្រឡាញ់ធ្វើដំណើរជ្រែកស្បៃរាត្រីឆ្លងកាត់ព្រំដែនទាំងគ្រោះថ្នាក់បំផុត ឆ្ពោះទៅកាន់ប្រទេសវៀតណាម ដើម្បីស្វែងរកគាំទ្រក្នុងការរំដោះជាតិ និងប្រជាជនកម្ពុជា ចេញពីក្រញាំបិសាចដ៏សែនឃោរឃៅ ប៉ុលពត៕
អត្ថបទ សេក ឧត្តម
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
