ស្វីស ៖ ឯកឧត្តមបណ្ឌិត លី ធុជ បានលើក ឡើងថា កិច្ចសង្រ្គោះជនរងគ្រោះដោយសារមីន គឺជាកិច្ច ការអាទិភាពមួយ ក្នុងចំណោមកិច្ចការអាទិភាពចំនួន ៣ របស់កម្ពុជាបានដាក់ចេញក្នុងនាមជាប្រធានអនុសញ្ញាអូតាវ៉ាឆ្នាំ២០២៤ និងក៏ជាកិច្ចការអាទិភាពរបស់ប្រទេសកម្ពុជាអស់រយៈពេលជាច្រើនឆ្នាំ ដែលកម្ពុជាបានយល់យ៉ាងច្បាស់អំពីសារៈសំខាន់នេះ ក្នុងនាមជាប្រទេសដែលធ្លាប់រងផលប៉ះពាល់ដោយសារមីន។ 

ការថ្លែងបញ្ជាក់បែបនេះក្នុងខណះឯកឧត្តមបណ្ឌិត លី ធុជ ប្រធានអនុសញ្ញាអូតាវ៉ាឆ្នាំ២០២៤បានដឹកនាំវេទិកាអ្នកជំនាញសង្រ្គោះជនរងគ្រោះដោយសារមីនឆ្នាំ២០២៤ នៃគណៈកម្មការស្តីពីកិច្ចសង្រ្គោះជនរង គ្រោះអនុសញ្ញាអូតាវ៉ា ដែលមានតំណាងនៃប្រទេស Burkina Faso ហូឡង់ ស្លូវេនី និង Zambia ជាសមាជិក នៅទីក្រុងហ្សឹណែវ ប្រទេសស្វីស ឆ្ពោះទៅរកកិច្ចប្រជុំកំពូលសៀមរាប-អង្គរស្តីពីពិភពលោកមួយដែលគ្មានមីនសម្រាប់ការកសាងនូវផែន ការសកម្មភាពថ្មី។  

ឯកឧត្តមបណ្ឌិត លី ធុជ ក៍បានកោតសរសើរចំពោះកិច្ចខិតខំប្រែងរបស់រដ្ឋភាគី និងដៃគូពាក់ព័ន្ធ ក្នុងការទាក់ទាញការយកចិត្តទុកដាក់ចំពោះអ្នករស់រានមានជីវិតពីគ្រោះថ្នាក់ ក្រុមគ្រួសារ និងសហគមន៍ដែលរងផលប៉ះពាល់ដោយសារមីនជុំវិញពិភពលោក ក៏ដូចជាចូលរួមចំណែកជាធាតុចូល ក្នុងការពិនិត្យឡើងវិញ និងផែនការសកម្មភាពអូស្លូ។ ទោះបីយ៉ាងណា យើងពិតជាត្រូវការបន្តពង្រីកបន្ថែមនូវកិច្ចខិតខំប្រឹងប្រែងទាំងថ្នាក់ជាតិ តំបន់ និងអន្តរជាតិ សម្រាប់ជំនួយជនរងគ្រោះ ដើម្បីផ្តល់អំណាចដល់ជនរងគ្រោះដោយសារមីនទាំងអស់ ។ ជាមួយគ្នានេះ ឯកឧត្តមប្រធានអនុសញ្ញាអូតាវ៉ាឆ្នាំ២០២៤ បានវាយតម្លៃខ្ពស់ចំពោះវឌ្ឍន ភាពនៃផែនការសកម្មភាពអូស្លូរយៈពេល៥ឆ្នាំ២០១៩ - ២០២៤ ទាក់ទងនឹងជំនួយជនរងគ្រោះ។

ឯកឧត្តមបណ្ឌិត លី ធុជ បន្តទៀតថា ឆ្នាំនេះគឺជាឆ្នាំដ៏សំ ខាន់សម្រាប់អនុសញ្ញាអូតាវ៉ា ដែលសហគមន៍អនុសញ្ញា នឹងប្រមូលផ្តុំគ្នានៅឯកិច្ចប្រជុំកំពូលសៀមរាប-អង្គរ ដើម្បីទទួលស្គាល់និងអបអរសាទរនូវសមិទ្ធផលរួម ក្នុងការអនុ ម័តផែនការសកម្មភាពថ្មី និងពង្រឹងការប្តេជ្ញាចិត្តឆ្ពោះ ទៅរកការលុបបំបាត់គ្រាប់មីន និងការផ្តល់អំណាចដល់ជនរង គ្រោះដោយសារមីន។ការរៀបចំនិងព្រាងផែនការសកម្ម ភាពថ្មី តម្រូវឱ្យមានផ្នែកដ៏រឹងមាំតម្រង់ទិសសកម្មភាពនិងភាពប្រាកដនិយមរួមបញ្ចូលលើជំនួយជនរងគ្រោះ ដោយ ធ្វើការពិនិត្យឡើងវិញ ដើម្បីកែលម្អលើកិច្ចខិតខំប្រឹងប្រែងកន្លងមកនិងធាតុចូលទទួលបានពីសន្និសីទសកលលើកទី៣ស្តីពីជំនួយជនរងគ្រោះដោយសារមីនដែលបានប្រព្រឹត្តិទៅនៅភ្នំពេញ ឆ្នាំ២០២៣កន្លងទៅ៕ អត្ថបទ ៖ ភារម្យ