ប្រទេសចិនបានឲ្យដឹងថា ខ្លួនមានឆន្ទៈក្នុងការសិក្សាគ្រោងការតភ្ជាប់ផ្លូវដែក ECRL ដែលមានតម្លៃ ១០ពាន់លានដុល្លាររបស់ម៉ាឡេស៊ីទៅកាន់គម្រោងផ្លូវដែកដែលគាំទ្រដោយប្រទេសចិនផ្សេងទៀត នៅក្នុងប្រទេសឡាវ និងថៃ ដោយគម្រោងមានសក្តានុពលក្នុងការជួយពង្រីកគំនិតផ្តួចផ្តើមខ្សែក្រវាត់ និងផ្លូវរបស់ទីក្រុងប៉េកាំង នៅទូទាំងតំបន់អាស៊ីអាគ្នេយ៍។

នាយករដ្ឋមន្ត្រីចិន លោក Li Qiang ដែលកំពុងបំពេញទស្សនកិច្ចរយៈពេល ៣ថ្ងៃ នៅប្រទេសម៉ាឡេស៊ី កាលពីថ្ងៃពុធ (ទី១៩ ខែមិថុនា) បាននិយាយថា គ្រោងការនេះនឹងធ្វើឲ្យខ្សែបណ្ដាញដ៏សំខាន់នៃគម្រោងផ្លូវរថភ្លើង Pan-Asia ដែលរត់ពីទីក្រុង Kunming ក្នុងប្រទេសចិន ទៅកាន់ប្រទេសសិង្ហបុរី ក្លាយជាការពិត។

លោក Li បាននិយាយថា៖ «គម្រោងនេះនឹងជំរុញឲ្យកាន់តែប្រសើរឡើងនូវការសាងសង់ច្រករបៀងពាណិជ្ជកម្មផ្លូវគោក និងសមុទ្រអន្តរជាតិថ្មី បង្កើនការតភ្ជាប់ក្នុងតំបន់ និងពង្រឹងការកសាងសហគមន៍អាស៊ានឲ្យកាន់តែស៊ីជម្រៅ»។

គួរបញ្ជាក់ថា លោក Li បានជួបនាយករដ្ឋមន្ត្រីម៉ាឡេស៊ី លោក Anwar Ibrahim នៅក្នុងរដ្ឋធានីរដ្ឋបាល Putrajaya បន្ទាប់ពីលោកបានទៅដល់ទីក្រុងគួឡាឡាំពួ កាលពីថ្ងៃអង្គារ សម្រាប់ដំណើរទស្សនកិច្ច ដើម្បីប្រារព្ធខួប ៥០ឆ្នាំនៃទំនាក់ទំនងការទូត រវាងប្រទេសទាំង២។

បន្ទាប់ពីមានកិច្ចប្រជុំបិទទ្វារ កាលពីថ្ងៃពុធ លោក Li និងលោក Anwar បានធ្វើជាសាក្សី ក្នុងពិធីចុះហត្ថលេខាលើកិច្ចព្រមព្រៀងជាច្រើន ក្នុងនោះរួមទាំងការបន្តឡើងវិញនូវកម្មវិធីរយៈពេល ៥ឆ្នាំ ដើម្បីសហការគ្នាក្នុងវិស័យនានា ដូចជាពាណិជ្ជកម្ម និងការវិនិយោគ កសិកម្ម ផលិតកម្ម ហេដ្ឋារចនាសម្ព័ន្ធ និងសេវាកម្មហិរញ្ញវត្ថុជាដើម។ នេះបើតាមសេចក្ដីថ្លែងការណ៍ នៅក្រោយកិច្ចប្រជុំនោះ៕