ទីក្រុង Ottawa កាលពីថ្ងៃពុធ (ទី១៩ ខែមិថុនា) បានដាក់បញ្ចូលកងឆ្មាំបដិវត្តន៍អ៊ីរ៉ង់ក្នុងបញ្ជីអង្គភាពភេរវករ ខណៈពេលដែលអំពាវនាវឲ្យប្រជាជនកាណាដាចាកចេញពីប្រទេសឥស្លាម។

រដ្ឋមន្ត្រីសុវត្ថិភាពសាធារណៈ លោក Dominic LeBlanc (ដូមីនិក ឡឺប្លង់) បានប្រាប់សន្និសីទសារព័ត៌មានមួយថា៖ «រដ្ឋាភិបាលរបស់យើង បានសម្រេចចុះបញ្ជីកងឆ្មាំបដិវត្តន៍អ៊ីស្លាមថា ជាអង្គភាពភេរវករ ក្រោមក្រមព្រហ្មទណ្ឌ»។

អមដោយរដ្ឋមន្ត្រីការបរទេស និងយុត្តិធម៌របស់កាណាដា លោក LeBlanc បានចោទប្រកាន់របបអ៊ីរ៉ង់ថា បាន «គាំទ្រចំពោះអំពើភេរវកម្ម» និង «បានបង្ហាញពីការមិនយកចិត្តទុកដាក់ ចំពោះសិទ្ធិមនុស្ស ទាំងនៅក្នុង និងក្រៅប្រទេសអ៊ីរ៉ង់ ក៏ដូចជាឆន្ទៈក្នុងការធ្វើឲ្យមានអស្ថិរភាពដល់សណ្តាប់ធ្នាប់ដែលផ្អែកលើច្បាប់អន្តរជាតិ»។

ដោយកត់សម្គាល់ពីការផ្ដាច់ទំនាក់ទំនងការទូតរបស់ទីក្រុង Ottawa ជាមួយទីក្រុងតេអេរ៉ង់ ក្នុងឆ្នាំ២០១២ រដ្ឋមន្ត្រីការបរទេស លោកស្រី Melanie Joly បានជំរុញឲ្យប្រជាជនកាណាដាកុំធ្វើដំណើរទៅកាន់អ៊ីរ៉ង់។

គួរបញ្ជាក់ថា បញ្ជីខ្មៅរបស់ប្រទេសកាណាដា រួមបញ្ចូលអង្គភាពចំនួនជិត ៨០ ដោយមានដូចជាក្រុមអាល់កៃដា ក្រុមហេសបូឡាហ៍ ក្រុមតាលីបង់ ក្រុមរដ្ឋអ៊ីស្លាម និងក្រុម Proud Boys ដែលជាក្រុមសកម្មប្រយុទ្ធហ្វាស៊ីសនិយម នៅអាមេរិកខាងជើង៕