ស្ត្រី ២នាក់ ត្រូវប្រឈមជាមួយនឹងកាត់ទោស កាលពីថ្ងៃពុធ (ទី១៩ ខែមិថុនា) ជុំវិញការអះអាងមិនពិត ដែលថា ស្ត្រីទី១ របស់បារាំង គឺលោកស្រី Brigitte Macron ជានារីកែភេទ ដែលការលើកឡើងបែបនេះបង្កឲ្យមានការរាលដាលនូវពាក្យចចាមអារ៉ាមតាមប្រព័ន្ធអ៊ីនធឺណិតពីពួកមានទ្រឹស្តីឃុបឃិតទុច្ចរិត និងក្រុមស្តាំជ្រុលនិយម។

គួរបញ្ជាក់ថា ក្នុងឆ្នាំ២០២២ លោកស្រី Brigitte Macron បានដាក់ពាក្យបណ្តឹងពីបទប្រមាថ ប្រឆាំងនឹងស្ត្រី ២នាក់ដែលបានបង្ហោះវីដេអូយូធូប កាលពីខែធ្នូ ឆ្នាំ២០២១ ដោយចោទប្រកាន់ថា លោកស្រីធ្លាប់ជាបុរសម្នាក់ដែលមានឈ្មោះថា «Jean-Michel»។ ការអះអាងនេះបានក្លាយជាទីអារម្មណ៍យ៉ាងខ្លាំងម្ដងទៀតតាមប្រព័ន្ធអនឡាញ ក្នុងរយៈពេលតែប៉ុន្មានសប្តាហ៍មុនការបោះឆ្នោតប្រធានាធិបតីឆ្នាំ២០២២។

ការកាត់ក្តីលើការចោទប្រកាន់ពីបទបរិហារកេរ្តិ៍នេះ កើតឡើងចំពេលមានយុទ្ធនាការដ៏គួរឲ្យភ្ញាក់ផ្អើលមួយ ដើម្បីឲ្យមានការបោះឆ្នោតសភាមុនអាណត្តិ ដែលត្រូវបានប្រកាសដោយប្រធានាធិបតី លោក Emmanuel Macron បន្ទាប់ពីក្រុមស្តាំជ្រុលនិយម បានផ្ដល់ភាពបរាជ័យដល់គណបក្សរបស់លោក នៅក្នុងការបោះឆ្នោតសភាសហភាពអឺរ៉ុប។

ជនជាប់ចោទអ្នកស្រី Amandine Roy ដែលប្រកាសដោយខ្លួនឯងថា ជាភ្នាក់ងារខាងចិត្តវិញ្ញាណ បានបង្ហាញខ្លួននៅចំពោះមុខតុលាការ ក្នុងទីក្រុងប៉ារីស នាថ្ងៃទី១៩ ខែមិថុនា ដើម្បីឆ្លើយសំណួរអំពីបទសម្ភាសន៍ ដែលលោកស្រីបានធ្វើឡើងជាមួយអ្នកសារព័ត៌មានឯករាជ្យ លោកស្រី Natacha Rey ដែលមិនមានវត្តមានក្នុងសវនាការនេះ ដោយសារជំងឺ។

មេធាវីរបស់លោកស្រី Brigitte Macron គឺលោក Jean Ennochi បាននិយាយថា៖ «ការប្រើប្រាស់ពាក្យដំណៀល គឺធំធេងណាស់ ដោយវាបានផ្ទុះឡើង នៅគ្រប់ទីកន្លែង»។ លោកមេធាវីរូបនេះបានទាមទារសំណងចំនួន ១០.០០០អឺរ៉ូ (ជាង ១០.០០០ដុល្លារ) ជាសំណង សម្រាប់លោកស្រី Brigitte Macron និងបងប្រុសរបស់លោកស្រី៕