អាជ្ញាធរនីហ្សេរីយ៉ា បាននិយាយកាលពីថ្ងៃពុធថា ការស៊ើបអង្កេតមួយត្រូវបានចាប់ផ្តើមលើការលេចធ្លាយប្រេងចេញពីអណ្តូងប្រេង នៅរដ្ឋ Bayelsa ជារដ្ឋនៅក្នុងតំបន់ដីសណ្ដនីហ្សេ ដែលសម្បូរប្រេងរបស់ប្រទេសនេះ។

លោក Solomon Ukponevi ប្រធានផ្នែកប្រតិបត្តិការនៅទីភ្នាក់ងារស្រាវជ្រាវ និងឆ្លើយតបការលេចធ្លាយប្រេងជាតិ ដែលជាស្ថាប័នគ្រប់គ្រងរបស់ប្រទេសនេះ បាននិយាយថា ការលេចធ្លាយនេះ ត្រូវបានរកឃើញក្នុងអំឡុងពេលប្រតិបត្តិការជាប្រចាំ កាលពីថ្ងៃចន្ទ នៅទីតាំងជីកយករ៉ែប្រេង នៅក្នុងតំបន់ Nembe ដែលជាសហគមន៍មួយ នៅរដ្ឋBayelsa។

លោក Ukponevi បានប្រាប់អ្នកយកព័ត៌មានថា រោងចក្រប្រេង ត្រូវបានបិទភ្លាមៗ ហើយក្រុមឆ្លើយតបបន្ទាន់ ត្រូវបានដាក់ពង្រាយ ដើម្បីចាត់វិធានការយ៉ាងប្រុងប្រយ័ត្ន ដើម្បីទប់ស្កាត់ការលេចធ្លាយ ខណៈដែលធនធានបន្ថែម កំពុងត្រូវបានប្រមូល។

លោកបាននិយាយថា ភ្នាក់ងារស្រាវជ្រាវ និងឆ្លើយតប បានកំណត់ពេលរួចជាស្រេចនូវការធ្វើដំណើរស៊ើបអង្កេតរួមគ្នាមួយ ទៅកាន់តំបន់នោះ ដើម្បីបញ្ជាក់ពីមូលហេតុនៃការលេចធ្លាយប្រេង បរិមាណប៉ាន់ស្មាននៃការប្រេងឆៅដែលបានលេចធ្លាយ និងផលប៉ះពាល់របស់វា ទៅលើបរិស្ថាន។