សារព័ត៌មាន «Times of India» នៅថ្ងៃព្រហស្បតិ៍ (ទី២០ ខែមិថុនា) បានរាយការណ៍ថា រលកកម្ដៅក្ដៅខ្លាំងឥតថមថយ ដែលបានកើតមាននៅទូទាំងភាគខាងជើងប្រទេសឥណ្ឌា បានបណ្ដាលឲ្យមនុស្សយ៉ាងហោចណាស់ ៥២នាក់ ស្លាប់ នៅទីក្រុងញូវដែលី ខណៈប្រទេសនេះបានប្រឈមជាមួយនឹងសីតុណ្ហភាពក្ដៅខ្លាំងបំផុត នារដូវក្ដៅនេះ។

សេចក្ដីរាយការណ៍របស់សារព័ត៌មាន Times of India នេះ បានបង្ហាញថា សពយ៉ាងហោចណាស់ចំនួន ៥២នាក់ ត្រូវបានបញ្ជូនទៅកាន់មន្ទីរពេទ្យ ក្នុងរយៈពេល ២ថ្ងៃកន្លងមកនេះ ដែលភាគច្រើនជាជនទុរគត និងជនទីទ័លក្រដែលរស់នៅ និងធ្វើការនៅទីហាលវាល។

គួរបញ្ជាក់ថា ប្រទេសឥណ្ឌាបានកត់ត្រាករណីសង្ស័យជាជំងឺសុរិយរោគជាង ៤០.០០០ករណី នៅរដូវក្តៅនេះ ហើយយ៉ាងហោចណាស់មនុស្ស ១១០នាក់ ត្រូវបានបញ្ជាក់ថា ស្លាប់ នៅចន្លោះថ្ងៃទី១ ខែមីនាដល់ថ្ងៃទី១៨ ខែមិថុនា នៅពេលដែលភាគពាយព្យ និងភាគខាងកើតប្រទេសឥណ្ឌា កត់ត្រាកម្រិត ២ដងនៃចំនួនថ្ងៃពីការមានរលកកម្ដៅធម្មតា។

ដោយលើកឡើងពីកង្វះខាតទឹក និងតម្រូវការថមពល សារព័ត៌មានភាសាហិណ្ឌូមួយនេះ បានឲ្យដឹងនៅក្នុងវិចារណកថាមួយ នាថ្ងៃព្រហស្បតិ៍នេះថា៖ «រដូវក្តៅអូសបន្លាយពេលយូរ គួរតែត្រូវបានចាត់ថ្នាក់ថា ជាគ្រោះមហន្តរាយធម្មជាតិ»។

ការិយាល័យអាកាសធាតុ បានព្យាករសីតុណ្ហភាពលើសពីធម្មតា សម្រាប់ខែនេះ ហើយទីក្រុងញូវដែលី បានជួបប្រទះនឹងពេលយប់ដ៏ក្តៅបំផុត ក្នុងរយៈពេលជាង ៥០ឆ្នាំ កាលពីថ្ងៃពុធ (ទី១៩ ខែមិថុនា) ដោយសីតុណ្ហភាពអប្បបរមាមានកម្រិត ៣៥,២អង្សាសេ។ នេះបើតាមការបង្ហាញក្នុងទិន្នន័យពីនាយកដ្ឋានអាកាសធាតុ៕