ក្រុមនាវិកឆ្មាំល្បាតសមុទ្ររបស់ចិន បានប្រើកាំបិត ពូថៅ និងអាវុធផ្សេងទៀត នៅក្នុងការប៉ះទង្គិចគ្នាជាមួយនាវាកងទ័ពជើងទឹកហ្វីលីពីន នៅក្បែរតំបន់ថ្មប៉ប្រះទឹកយុទ្ធសាស្ត្រ ក្នុងសមុទ្រចិនខាងត្បូង។ នេះបើតាមរូបភាពវីដេអូថ្មីពាក់ព័ន្ធនឹងរឿងរ៉ាវជម្លោះដែលត្រូវបានចេញផ្សាយដោយទីក្រុងម៉ានីល។

ការប៉ះទង្គិចគ្នានោះ បានកើតឡើង កាលពីថ្ងៃទី១៧ ខែមិថុនា ខណៈដែលកងកម្លាំងហ្វីលីពីនមានបំណងផ្ដល់សម្ភារផ្គត់ផ្គង់ដល់កងម៉ារីនឈរជើងនៅលើនាវាចម្បាំងដែលត្រូវបានចតទុកចោលដោយចេតនា នៅលើតំបន់មានជម្លោះ គឺតំបន់ថ្មប៉ប្រះទឹក Second Thomas Shoal ក្នុងឆ្នាំ១៩៩៩ ដើម្បីអះអាងដល់ការទាមទារដែនដីរបស់ទីក្រុងម៉ានីល។

ហេតុការណ៍នោះ គឺជាការប្រឈមមុខដាក់គ្នាដែលកំពុងតែកើនឡើងជាបន្តបន្ទាប់ រវាងនាវាចិន និងហ្វីលីពីន ក្នុងប៉ុន្មានខែថ្មីៗនេះ ខណៈដែលទីក្រុងប៉េកាំងបង្កើនកិច្ចខិតខំប្រឹងប្រែង ដើម្បីជំរុញការទាមទាររបស់ខ្លួន នៅតំបន់មានជម្លោះ។

ប្រមុខយោធាហ្វីលីពីន លោកឧត្តមសេនីយ៍ Romeo Brawner បាននិយាយថា នាវិកហ្វីលីពីន «ដែលមានចំនួនច្រើនជាង» គ្មានអាវុធ ហើយបានប្រយុទ្ធដោយដៃទទេ។ ហើយបើយោងតាមយោធាហ្វីលីពីន បានឲ្យដឹងថា នាវិកហ្វីលីពីនម្នាក់ បានដាច់មេដៃ នៅក្នុងការប៉ះទង្គិចគ្នានេះ ដែលឆ្មាំសមុទ្រចិន បានរឹបអូស ឬបំផ្លាញឧបករណ៍របស់ហ្វីលីពីន ក្នុងនោះរួមទាំងកាំភ្លើងផងដែរ។

តែយ៉ាងណាក្ដី ខ្សែវីដេអូនៃការប៉ះទង្គិចគ្នាដែលបង្ហាញដោយទីក្រុងម៉ានីល គឺផ្ទុយស្រឡះពីរូបថតដែលបានចេញផ្សាយដោយប្រព័ន្ធផ្សព្វផ្សាយរដ្ឋរបស់ទីក្រុងប៉េកាំង កាលពីថ្ងៃទី១៩ ខែមិថុនា ដែលមិនបានបង្ហាញថា កងកម្លាំងចិនប្រើប្រាស់អាវុធនោះឡើយ៕