ប្រទេសកូរ៉េខាងត្បូង នៅថ្ងៃព្រហស្បតិ៍ (ទី២០ ខែមិថុនា) នេះ បានឲ្យដឹងថា ខ្លួននឹងពិចារណាឡើងវិញនូវលទ្ធភាព ក្នុងការផ្ដល់អាវុធដល់ប្រទេសអ៊ុយក្រែន។ នេះបើយោងតាមសារព័ត៌មាន Yonhap ដែលបានរាយការណ៍ដោយដកស្រង់សម្តីមន្ត្រីមួយរូប បន្ទាប់ពីមេដឹកនាំកូរ៉េខាងជើង និងរុស្ស៊ី បានចុះហត្ថលេខាលើកិច្ចព្រមព្រៀង ដែលសន្យាការពារគ្នាទៅវិញទៅមក ក្នុងករណីមានសង្រ្គាម។

ជាមួយគ្នានេះ នៅក្នុងសេចក្តីថ្លែងការណ៍ផ្លូវការមួយ ដែលបានចេញផ្សាយនៅថ្ងៃព្រហស្បតិ៍នេះ ទីក្រុងសេអ៊ូល ក៏បានថ្កោលទោសកិច្ចព្រមព្រៀងភាពជាដៃគូយុទ្ធសាស្ត្រគ្រប់ជ្រុងជ្រោយ ដែលបានចុះហត្ថលេខាដោយមេដឹកនាំកូរ៉េខាងជើង និងរុស្ស៊ី ក្នុងសប្តាហ៍នេះ ដោយលើកឡើងថា កិច្ចព្រមព្រៀងនោះបំពានលើទណ្ឌកម្មរបស់អង្គការសហប្រជាជាតិ (UN)។

តាមរយៈសេចក្តីថ្លែងការណ៍នោះ អមដោយការបន្ថែមថា ការបំពានបែបនេះនឹងធ្វើឲ្យទំនាក់ទំនងរបស់ទីក្រុងសេអ៊ូលជាមួយទីក្រុងមូស្គូកាន់តែអាក្រក់ទៅៗ ការិយាល័យប្រធានាធិបតីបានប្រាប់ឲ្យដឹងថា៖ «រដ្ឋាភិបាលសង្កត់ធ្ងន់យ៉ាងច្បាស់លាស់ថា កិច្ចសហប្រតិបត្តិការណាមួយដែលជួយកូរ៉េខាងជើងដោយផ្ទាល់ ឬដោយប្រយោល គឺជាការរំលោភលើសេចក្តីសម្រេចរបស់ក្រុមប្រឹក្សាសន្តិសុខ UN ហើយជាកម្មវត្ថុនៃការត្រួតពិនិត្យ និងការដាក់ទណ្ឌកម្មពីសំណាក់សហគមន៍អន្តរជាតិ»។

គួរបញ្ជាក់ថា កូរ៉េខាងជើង និងរុស្ស៊ី បានស្តារឡើងវិញនូវកិច្ចព្រមព្រៀង ដែលបានធ្វើឡើងអំឡុងសម័យសង្គ្រាមត្រជាក់ នៅពេលដែលមេដឹកនាំនៃប្រទេសទាំង២ បានជួបប្រជុំគ្នា នៅទីក្រុងព្យុងយ៉ាង ក្នុងសប្តាហ៍នេះ ហើយបានយល់ព្រមផ្តល់ជំនួយយោធា ប្រសិនបើពួកគេត្រូវបានវាយប្រហារឥតឈប់ឈរ៕