ក្រុមបាតុករ នាំគ្នាដង្ហែក្បួនឆ្លងកាត់ទីក្រុងនានានៅទូទាំងប្រទេសកេនយ៉ានាថ្ងៃព្រហស្បតិ៍នេះ ដើម្បីតវ៉ាប្រឆាំងនឹងផែនការរកប្រាក់ ២,៧ពាន់លានដុល្លារ ពីពន្ធបន្ថែម ដើម្បីកាត់បន្ថយឱនភាពថវិកា ។

នៅក្នុងទីក្រុង Eldoret ក្រុមបាតុករ នាំគ្នាដង្ហែក្បួនឆ្លងកាត់ដងផ្លូវជាច្រើន ក្នុងនោះបាតុករមួយចំនួន នាំគ្នាកាន់បដាប្រឆាំងនឹងរដ្ឋាភិបាលកេនយ៉ា ។

ក្រុមបាតុករ និយាយថា ការដំឡើងពន្ធ នឹងធ្វើឲ្យប៉ះពាល់ដល់សេដ្ឋកិច្ច និងដំឡើងថ្លៃរស់នៅសម្រាប់ពលរដ្ឋកេនយ៉ា ដែលយ៉ាប់យ៉ឺនរួចទៅហើយ ក្នុងការឈានដល់តម្រូវការប្រចាំថ្ងៃរបស់ពួកគេ ។

គួរឲ្យដឹងថា រដ្ឋបាលរបស់លោកប្រធានាធិបតី William Ruto គ្រោងនឹងដំឡើងពន្ធប្រេង និងការនាំចេញ បើទោះបីជាលោកយល់ព្រមដកចេញពន្ធមួយចំនួន ក្រោយមានបាតុកម្មកាលពីដើមសប្តាហ៍នេះក៏ដោយ ។

រដ្ឋាភិបាល បានការពារការដំឡើងពន្ធនេះ ដោយពួកគេនិយាយថា វាចាំបាច់ដើម្បីពង្រឹងប្រាក់ចំណូល និងកាត់បន្ថយការពឹងផ្អែកលើប្រាក់កម្ចីពីបរទេស ។

ទោះបីជាយ៉ាងណាក៏ដោយ ក្រុមអ្នករិះគន់ និយាយជំទាស់ថា ការផ្លាស់ប្តូរនេះ នឹងដាក់បន្ទុកកាន់តែធ្ងន់លើពលរដ្ឋកេនយ៉ា ដែលត្រដាបត្រដួលរួចទៅហើយដោយសារតែអតិផរណាហក់ឡើងខ្ពស់ ៕