អ្នកស្រី Zhang Junying ដែលជាកសិករដាំពោតនៅខេត្ត Shandong ប្រទេសចិន បានស្រក់ទឹកភ្នែក ពេលមើលឃើញវាលចម្ការដ៏ធំល្វឹងល្វើយរបស់គាត់ ប្រឈមការខូចខាតដោយសារគ្រោះរាំងស្ងួត ។

អ្នកស្រី និងប្រជាកសិករជាច្រើនទៀតរស់នៅទីក្រុង Jinan រដ្ឋធានីខេត្ត Shandong ដឹងច្បាស់ថា ពួកគេប្រឈមនឹងការខាតបង់ ពេលដែលគ្រោះរាំងស្ងួត និងរលកកម្តៅ បានវាយប្រហារតំបន់ជាច្រើននៅក្នុងប្រទេសចិន ។

អ្នកស្រី Zhang និយាយលាយឡំទឺកភ្នែកថា ខ្ញុំសង្ឃឹមថា រដ្ឋាភិបាលអាចកាត់បន្ថយបន្ទុកលើកសិករ ។ វានឹងកាន់តែប្រសើរ បើសិនជារដ្ឋាភិបាលផ្គត់ផ្គង់ទឹកដល់ប្រជាកសិករ ។

អ្នកស្រីបន្តថា នេះគឺជាសំឡេងចេញពីបេះដូងកសិករ វាពិតជាពិបាកខ្លាំងណាស់សម្រាប់កសិករ ។

ទូរទស្សន៍រដ្ឋចិន CCTV រាយការណ៍ថា នៅតាមតំបន់មួយចំនួនក្នុងខេត្តដំាស្រូវសាលី ដូចជាខេត្ត Hebei, Henan និងខេត្ត Shandong សីតុណ្ហភាព បានកើនឡើងដល់ ៤៤អង្សាសេ ដែលជាសីតុណ្ហភាពខ្ពស់បំផុតបំបែកកំណត់ត្រាជាប្រវត្តិសាស្រ្តសម្រាប់ខែមិថុនា ។

នៅដើមខែនេះ ទីក្រុង Jinan ស្ថិតក្នុងខេត្ត Shandong បានចេញសេចក្តីប្រកាសអាសន្នកម្រិតខ្ពស់បំផុត ដោយបានព្រមានដល់អ្នកស្រុកថា សីតុណ្ហភាពនៅតាមតំបន់មួយចំនួន អាចនឹងកើនឡើងដល់ ៤២អង្សាសេ ។

កាលពីថ្ងៃចន្ទដើមសប្តាហ៍នេះ ក្រសួងកសិកម្ម និងកិច្ចការជនបទរបស់ចិន បានចេញការឆ្លើយតបគ្រាអាសន្នកម្រិតទី ៣ ចំពោះគ្រោះរាំងស្ងួតនៅខេត្ត Hebei, Shanxi, Shandong និងខេត្ត Henan ៕