ស្ត្រីជនជាតិអាមេរិកដើមកំណើតរុស្សីម្នាក់ដែលត្រូវបានចាប់ខ្លួននៅដើមឆ្នាំនេះ ខណៈពេលដែលទៅសួរសុខទុក្ខគ្រួសារក្នុងប្រទេសរុស្ស៊ី បានឡើងសវនាការ នៅថ្ងៃព្រហស្បតិ៍ (ទី២០ ខែមិថុនា) នេះ ពាក់ព័ន្ធនឹងករណីក្បត់ជាតិ បន្ទាប់ពីអាជ្ញាធរបានចោទប្រកាន់រូបនាងថា បានរៃអង្គាសប្រាក់បញ្ជូនទៅឲ្យកងទ័ពអ៊ុយក្រែន។

ជនជាប់ចោទ Karelina ដែលកើតក្នុងប្រទេសរុស្ស៊ី ប៉ុន្តែបានសាងជីវិតថ្មីជាអ្នកជំនាញផ្នែកកែសម្ផស្ស នៅឯស្ប៉ាមួយកន្លែង ក្នុងទីក្រុង Los Angeles បន្ទាប់ពីបានក្លាយជាជនអន្តោប្រវេសន៍ នៅសហរដ្ឋអាមេរិក កាលពីជាង ១ទសវត្សរ៍មុននោះ ប្រឈមនឹងការកាត់ទោសជាប់ពន្ធនាគាររយៈពេល ១២ឆ្នាំ ប្រសិនបើរកឃើញថា មានទោស។

គួរបញ្ជាក់ថា ការកាត់ក្តីរបស់នាងនឹងត្រូវធ្វើឡើងដោយបិទទ្វារ ដែលជាទម្លាប់នៅក្នុងករណីបែបនេះ នៅប្រទេសរុស្ស៊ី។ ហើយការដោះលែងឲ្យរួចទោសពីបទក្បត់ជាតិ គឺកម្រកើតមានណាស់។

តុលាការនៅទីក្រុង Yekaterinburg នៃតំបន់ Urals បានចេញផ្សាយវីដេអូខ្លីមួយរបស់នាង Karelina អង្គុយនៅក្នុងបន្ទប់ប្រអប់កញ្ចក់។ នាងមានស្នាមញញឹមតិចៗ ពេលអ្នកសារព័ត៌មានផ្ដិតយករូបភាព។

ប៉ុន្តែសេចក្តីជូនដំណឹងនៅលើគេហទំព័ររបស់តុលាការ ដែលបានបង្ហោះនៅយប់ថ្ងៃព្រហស្បតិ៍នេះ បានឲ្យដឹងថា ការកាត់ក្តីត្រូវបានពន្យារពេលរហូតដល់ថ្ងៃទី៧ ខែសីហា។ តុលាការមិនបានបញ្ជាក់អំពីហេតុផលឡើយ៕