រលកកម្ដៅដ៏ក្ដៅគគុកកំពុងឆាបឆេះទីក្រុងនានានៅលើទ្វីបជាច្រើនទូទាំងពិភពលោក នៅពេលអឌ្ឍគោលខាងជើងចាប់ផ្ដើមថ្ងៃដំបូងនៃរដូវក្តៅ ដោយនោះជាសញ្ញាមួយដែលថាបម្រែបម្រួលអាកាសធាតុអាចជួយជំរុញកម្ដៅកម្រិតបំបែកកំណត់ត្រា ហើយអាចឡើងលើសពីរដូវក្តៅមុនៗដែលក្តៅបំផុតក្នុងរយៈពេល ២.០០០ ឆ្នាំ។ សីតុណ្ហភាពក្នុងរយៈពេលប៉ុន្មានថ្ងៃចុងក្រោយនេះត្រូវបានគេសង្ស័យថាបានបណ្តាលឱ្យមនុស្សរាប់រយ ឬរាប់ពាន់នាក់ស្លាប់នៅទូទាំងអាស៊ី និងអឺរ៉ុប។

នៅអារ៉ាប៊ីសាអ៊ូឌីត និងអេហ្ស៊ីប អ្នកធ្វើធម្មយាត្រាមូស្លីមជិតពីរលាននាក់កំពុងបញ្ចប់ពិធីបុណ្យហាជី (Hajj) ហើយមនុស្សជាងមួយពាន់នាក់ បានស្លាប់ក្នុងអំឡុងពេលធ្វើដំណើរស្របពេលមានសីតុណ្ហភាពលើសពី ៥១ អង្សាសេ នេះបើយោងតាមរបាយការណ៍ពីអាជ្ញាធរបរទេស។

បណ្តាប្រទេសជុំវិញសមុទ្រមេឌីទែរ៉ាណេក៏បានស៊ូទ្រាំនឹងអាកាសធាតុក្តៅខ្លាំងមួយសប្តាហ៍ទៀត ដែលបានរួមចំណែកដល់ចំហេះព្រៃចាប់ពីប្រទេសព័រទុយហ្គាល់ រហូតដល់ក្រិក។ ទ្វីបអឺរ៉ុបនៅឆ្នាំនេះ បាននឹងកំពុងប្រឈមមុខនឹងការស្លាប់ និងបាត់ខ្លួនភ្ញៀវទេសចរជាច្រើន ស្របពេលមានរលកកម្ដៅដ៏គ្រោះថ្នាក់។

មួយភាគធំនៃភាគខាងកើតសហរដ្ឋអាមេរិក ក៏កំពុងស្ថិតក្រោមអាកាសធាតុក្ដៅខ្លាំងអស់រយៈពេលបួនថ្ងៃជាប់ៗគ្នានៅក្រោមរលកកម្ដៅគ្របដណ្ដប់ ឬដូមកម្ដៅ។ កម្ដៅកម្រិតបំបែកកំណត់ត្រាក៏បានឆាបឆេះផ្នែកធំៗនៃអាស៊ីផងដែរ ដោយបានសម្លាប់មនុស្សរាប់រយនាក់ បំផ្លាញដំណាំ និងបង្ខំឱ្យសាលារៀនត្រូវបិទទ្វារ៕