ក្រុមហ៊ុន ទីកតុក (TikTok) និងក្រុមហ៊ុនមេមានមូលដ្ឋាននៅចិន បៃឌែនស៍ (ByteDance) កាលពីថ្ងៃព្រហស្បតិ៍ (២០ មិថុនា) បានជំរុញឱ្យតុលាការសហរដ្ឋអាមេរិក លុបចោលច្បាប់ដែលពួកគេនិយាយថានឹងហាមឃាត់កម្មវិធីវីដេអូខ្លីដ៏ពេញនិយមរបស់ខ្លួននៅសហរដ្ឋអាមេរិក នៅថ្ងៃទី១៩ ខែមករា ឆ្នាំក្រោយនេះ ដោយនិយាយថា ព្រោះតែរដ្ឋាភិបាលសហរដ្ឋអាមេរិក បានបដិសេធមិនចូលរួមក្នុងកិច្ចពិភាក្សាដំណោះស្រាយម៉ឹងម៉ាត់ណាមួយឡើយបន្ទាប់ពីឆ្នាំ២០២២។

ច្បាប់ ដែលបានចុះហត្ថលេខាកាលពីខែមេសា ដោយលោកប្រធានាធិបតី ចូ បៃដិន (Joe Biden) ផ្តល់ពេលឱ្យក្រុមហ៊ុន បៃឌែនស៍ រហូតដល់ថ្ងៃទី១៩ ខែមករា ឆ្នាំក្រោយ ដើម្បីលក់ភាគហ៊ុន TikTok របស់សហរដ្ឋអាមេរិក បើមិនដូច្នេះទេខ្លួនប្រឈមនឹងការហាមឃាត់លើកម្មវិធីដ៏ល្បីដែលប្រើប្រាស់ដោយជនជាតិអាមេរិកចំនួន ១៧០ លាននាក់។ បៃឌែនស៍ និយាយថាការលក់ អេប (App) គឺ «មិនអាចទៅរួចទេទាំងលក្ខខណ្ឌបច្ចេកវិទ្យា ពាណិជ្ជកម្ម ឬភាពស្របច្បាប់»៕

សាលាឧទ្ធរណ៍របស់សហរដ្ឋអាមេរិក នៅទីក្រុងវ៉ាស៊ីនតោន នឹងធ្វើការជជែកផ្ទាល់មាត់លើបណ្តឹងដែលប្តឹងដោយ TikTok និង បៃឌែនស៍ រួមជាមួយនឹងអ្នកប្រើប្រាស់ TikTok នៅថ្ងៃទី១៦ ខែកញ្ញា ខាងមុខនេះ។ អនាគតរបស់ TikTok នៅសហរដ្ឋអាមេរិក អាចនឹងស្ថិតនៅលើលទ្ធផលនៃសំណុំរឿងនោះ ដែលអាចជះឥទ្ធិពលដល់មធ្យោបាយរដ្ឋាភិបាលសហរដ្ឋអាមេរិក ក្នុងការប្រើប្រាស់សិទ្ធិអំណាចថ្មីរបស់ខ្លួន ដើម្បីទប់ស្កាត់កម្មវិធីដែលគ្រប់គ្រងដោយបរទេស។

ដោយសារការព្រួយបារម្ភក្នុងចំណោមសមាជិកសភាអាមេរិក ដែលថាចិន អាចចូលប្រើទិន្នន័យជនជាតិអាមេរិក ឬចារកម្មលើពួកគេដោយប្រើកម្មវិធីវីដេអូខ្លី TikTok វិធានការនេះត្រូវបានអនុម័តក្នុងសំឡេងគាំទ្រយ៉ាងលើសលប់នៅក្នុងសភា ត្រឹមតែប៉ុន្មានសប្តាហ៍ប៉ុណ្ណោះបន្ទាប់ពីការដាក់ស្នើ។

ក្រុមមេធាវីសម្រាប់ក្រុមអ្នកប្រើប្រាស់ TikTok ដែលបានប្តឹងដើម្បីការពារអេបនេះពីការហាមឃាត់បាននិយាយថា ច្បាប់នេះនឹងរំលោភលើសិទ្ធិបញ្ចេញមតិដោយសេរីរបស់ប្រជាជន៕