បេក្ខជនប្រធានាធិបតីនៃគណបក្សសាធារណរដ្ឋ លោក ដូណាល់ ត្រាំ (Donald Trump) នៅក្នុងបទសម្ភាសន៍មួយដែលបានចេញផ្សាយកាលពីថ្ងៃព្រហស្បតិ៍ (២០ មិថុនា) បាននិយាយថា និស្សិតដែលបានបញ្ចប់ការសិក្សាពីមហាវិទ្យាល័យនៅសហរដ្ឋអាមេរិក គួរតែទទួលបានកាតបៃតង ឬប័ណ្ណស្នាក់នៅអចិន្ត្រៃយ៍ដើម្បីស្នាក់នៅក្នុងប្រទេស ដោយនោះជាការលើកឡើងដែលផ្ទុយទៅនឹងជំហរអន្តោប្រវេសន៍ដ៏តឹងរឹងរបស់ខ្លួន។

ក្នុងអំឡុងពេលបទសម្ភាសន៍ជាមួយប្រព័ន្ធផ្សព្វផ្សាយ អល-អ៊ីន (All-In) ដែលរៀបចំដោយវិនិយោគិនបច្ចេកវិទ្យា អ្នកវិនិយោគ លោក ចេសុន ខាឡាខានីស (Jason Calacanis) បានប្រាប់លោក ត្រាំ ថាសហរដ្ឋអាមេរិក ត្រូវការការរក្សាដោយស្របច្បាប់នូវកម្មករមានជំនាញខ្ពស់បន្ថែមទៀត ដែលជាបញ្ហាចម្បងសម្រាប់ឧស្សាហកម្មបច្ចេកវិទ្យា។

នៅពេលត្រូវលោក ខាឡាខានីស សាកសួរថាតើលោក ត្រាំ អាចសន្យាបានទេថានឹងផ្តល់នូវសមត្ថភាពបន្ថែមទៀតក្នុងការនាំចូលអ្នកធ្វើការល្អបំផុត និងជំនាញបំផុតជុំវិញពិភពលោកទៅអាមេរិក លោក ត្រាំ ឆ្លើយថា «ខ្ញុំសន្យា ប៉ុន្តែខ្ញុំយល់ព្រមតែលើករណីអ្នកបញ្ចប់ការសិក្សាពីមហាវិទ្យាល័យអាមេរិក។ ខ្ញុំគិតថាពួកគេគួរតែទទួលបានកាតបៃតងដោយស្វ័យប្រវត្តិជាផ្នែកនៃសញ្ញាប័ត្ររបស់គេ ដើម្បីអាចស្នាក់នៅក្នុងប្រទេសនេះ ហើយរួមទាំងនិស្សិតមិនទាន់បញ្ចប់មហាវិទ្យាល័យ»។

កាតបៃតង ដែលត្រូវបានគេស្គាល់ថាជាប័ណ្ណស្នាក់នៅអចិន្ត្រៃយ៍ អនុញ្ញាតឱ្យបុគ្គលម្នាក់ៗមានសិទ្ធិរស់នៅ និងធ្វើការជាអចិន្ត្រៃយ៍នៅក្នុងសហរដ្ឋអាមេរិក និងជាជំហានឆ្ពោះទៅរកភាពជាពលរដ្ឋ។ គេមិនច្បាស់ទេថា តើលោក ត្រាំ សំដៅលើជនបរទេសទាំងអស់ រួមទាំងអ្នកដែលមកសហរដ្ឋអាមេរិកដោយខុសច្បាប់ និងអ្នកស្នាក់នៅហួសទិដ្ឋាការ ឬក៏មានតែអ្នកដែលមានទិដ្ឋាការសិស្សប៉ុណ្ណោះដែលអាចមានសិទ្ធិនេះ៕