សហរដ្ឋអាមេរិក បានប្រាប់អ៊ុយក្រែនថា ខ្លួនអាចប្រើសព្វាវុធដែលផ្គត់ផ្គង់ដោយអាមេរិក ដើម្បីវាយប្រហារលើកងកម្លាំងរុស្ស៊ីណា ដែលវាយប្រហារឆ្លងព្រំដែន មិនមែនតែនៅក្នុងតំបន់ក្បែរទីក្រុងខាគីវនោះទេ។ នេះបើយោងតាមមន្ត្រីអាមេរិក។

ការផ្លាស់ប្តូរដ៏ប៉ិនប្រសប់នៃការផ្ញើសារ ដែលក្រុមមន្ត្រីទទូចថា មិនមែនជាការផ្លាស់ប្តូរគោលនយោបាយ កើតឡើងតែប៉ុន្មានសប្តាហ៍ប៉ុណ្ណោះ បន្ទាប់ពីសហរដ្ឋអាមេរិក បានផ្តល់ភ្លើងខៀវស្ងាត់ៗ ដល់ទីក្រុងគីវឲ្យធ្វើការវាយប្រហារ នៅក្នុងប្រទេសរុស្ស៊ី ដើម្បីឆ្លើយតបទៅនឹងការវាយលុកឆ្លងព្រំដែនលើទីក្រុងខាគីវ។ នៅពេលនោះ មន្ត្រីអាមេរិក បានសង្កត់ធ្ងន់ថា គោលនយោបាយ ត្រូវបានកំណត់ចំពោះតំបន់ខាគីវ ក្នុងចំណោមការរឹតបន្តឹងផ្សេងទៀត។

ចាប់តាំងពីពេលនោះមក កងកម្លាំងអ៊ុយក្រែន បានប្រើប្រាស់អាវុធរបស់អាមេរិក ដើម្បីវាយប្រហារចូលប្រទេសរុស្ស៊ី យ៉ាងហោចណាស់ម្តង ដោយបានបំផ្លាញគោលដៅនានា នៅក្នុងទីក្រុង Belgorod និងអាចទប់ទល់នឹងការវាយប្រហាររបស់រុស្ស៊ី។ ប៉ុន្តែមន្ត្រីអ៊ុយក្រែន និងអឺរ៉ុបផ្សេងទៀត បានដាក់សម្ពាធដល់អាមេរិកឲ្យបន្ធូរបន្ថយការរឹតត្បិតបន្ថែមទៀត ដោយអនុញ្ញាតឲ្យអ៊ុយក្រែនវាយប្រហារគ្រប់ទីកន្លែង នៅក្នុងប្រទេសរុស្ស៊ី។

ទីប្រឹក្សាសន្តិសុខជាតិលោក Jake Sullivan បានប្រាប់សារព័ត៌មាន PBS កាលពីថ្ងៃអង្គារថា កិច្ចព្រមព្រៀងជាមួយអ៊ុយក្រែនអំពីការវាយប្រហារដោយអាវុធអាមេរិក ចូលទៅក្នុងប្រទេសរុស្ស៊ី បានពង្រីកដល់    «កន្លែងណាដែលកងកម្លាំងរុស្ស៊ី កំពុងឆ្លងកាត់ព្រំដែនពីភាគីរុស្ស៊ី ទៅភាគីអ៊ុយក្រែន ដើម្បីព្យាយាមដណ្តើមយកទឹកដីអ៊ុយក្រែនបន្ថែមទៀតនោះ»។