ប្រព័ន្ធផ្សព្វផ្សាយរដ្ឋចិន បានរាយការណ៍ថា ដំណើរទស្សនកិច្ចរបស់រដ្ឋមន្ត្រីសេដ្ឋកិច្ចអាល្លឺម៉ង់ទៅកាន់ប្រទេសចិន ក្នុងសប្តាហ៍នេះ នឹងក្លាយជាឱកាសមួយ ដើម្បីឲ្យប្រទេសសេដ្ឋកិច្ចដ៏ធំបំផុតរបស់អឺរ៉ុបមួយនេះ ស្វែងរកការឯកភាព ជាជាងការប្រឈមមុខដាក់គ្នា ចំពេលមានភាពតានតឹងពាណិជ្ជកម្ម ជាមួយសហភាពអឺរ៉ុប (EU) ជុំវិញរថយន្តអគ្គិសនី។

រដ្ឋមន្ត្រីសេដ្ឋកិច្ចអាល្លឺម៉ង់ លោក Robert Habeck នឹងទៅដល់ទីក្រុងប៉េកាំង នៅថ្ងៃសុក្រ (ទី២១ ខែមិថុនា) នេះ ខណៈដែលគណៈកម្មការអឺរ៉ុប នឹងដំឡើងពន្ធកាន់តែខ្ពស់លើការនាំចូលរថយន្តអគ្គិសនីដែលផលិតដោយចិន ដោយការសម្រេចនេះបាននាំឲ្យមានវិធានការតបតពីចិន និងការរិះគន់យ៉ាងធ្ងន់ៗពីបណ្ដាមេដឹកនាំចិន។

ជាក់ស្ដែង សប្តាហ៍នេះតែមួយ ក្រុមហ៊ុនផលិតរថយន្តជាច្រើនរបស់ចិន បានជំរុញឲ្យទីក្រុងប៉េកាំងដំឡើងពន្ធលើរថយន្តប្រើប្រេងសាំងដែលត្រូវបាននាំចូលពីអឺរ៉ុប ដើម្បីជាការសងសឹក ចំពោះចំណាត់ការរបស់ទីក្រុងប៊្រុចសែល។

យ៉ាងណាក្ដី សារព័ត៌មានចេញផ្សាយប្រចាំថ្ងៃដែលគ្រប់គ្រងដោយរដ្ឋចេញ បានឲ្យដឹងថា អ្នកជំនាញមួយចំនួន បានលើកឡើងថា ដំណើរទស្សនកិច្ចរយៈពេល ៣ថ្ងៃនេះ ត្រូវបានមើលឃើញថា ជាឱកាសមួយ ដើម្បីឲ្យប្រទេសអាល្លឺម៉ង់ស្វែងរកការឯកភាពគ្នា។

ដោយដកស្រង់សម្ដីពីអ្នកជំនាញម្នាក់ សារព័ត៌មាន Global Times បានចុះផ្សាយថា៖ «ប្រសិនបើអាល្លឺម៉ង់ អាចដោះស្រាយជម្លោះពាណិជ្ជកម្មនាពេលខាងមុខ រវាងចិន និង EU ដោយមិនឲ្យមានការប្រឈមមុខដាក់គ្នានោះ វាអាចផ្តល់នូវគំរូថ្មីមួយ សម្រាប់សណ្តាប់ធ្នាប់ និងអភិបាលកិច្ចសេដ្ឋកិច្ចសកល ជាពិសេសនៅពេលដែលអឺរ៉ុបកំពុងប្រឈមនឹងជម្លោះជាច្រើន»។

លោក Habeck ដែលដោយផ្ទាល់ខ្លួនបាននិយាយប្រឆាំងនឹងការដំឡើងពន្ធខ្ពស់ ជាមធ្យោបាយចុងក្រោយនោះ បានប្រាប់ថា៖ «ប្រទេសចិន គឺជាដៃគូដែលមិនអាចខ្វះបាន សម្រាប់ការប្រកួតប្រជែងជាសកល»៕