រដ្ឋមន្ត្រីក្រសួងរតនាគារអាមេរិក លោកស្រី Janet Yellen កាលពីថ្ងៃព្រហស្បតិ៍ (ទី២០ ខែមិថុនា) បាននិយាយការពារការដំឡើងពន្ធរបស់ប្រធានាធិបតីអាមេរិក លោក Joe Biden ចំពោះទំនិញចិនមួយចំនួន ដោយលោកស្រីលើកឡើងថា នេះគឺជាយុទ្ធសាស្ត្រដ៏ខ្ពស់ ប៉ុន្តែបានសង្កត់ធ្ងន់ថា សំណើពន្ធរបស់បេក្ខជនប្រធានាធិបតីរបស់គណបក្សសាធារណរដ្ឋ គឺលោក Donald Trump នឹងកាន់តែបង្កឲ្យមានភាពស្មុគស្មាញខ្លាំងឡើងៗ និងបង្កើនការចំណាយរឹតតែខ្ពស់ សម្រាប់អ្នកប្រើប្រាស់តែប៉ុណ្ណោះ។

លោកស្រី Yellen បានប្រាប់សន្និសីទសារព័ត៌មាន នៅទីក្រុង Atlanta ថា ការដាក់ពន្ធគយថ្មីរបស់លោក Biden មានគោលបំណងការពាររថយន្តអគ្គិសនី ផលិតផលថាមពលពន្លឺព្រះអាទិត្យ និងបន្ទះអេឡិកត្រូនិក ពីសមត្ថភាពផ្គត់ផ្គង់ជ្រុសហួសហេតុរបស់ចិនដែលបង្កើតឡើងដោយការវិនិយោគលើសពីតម្រូវការរបស់ទីក្រុងប៉េកាំង។

លោកស្រីបានបន្ថែមថា រដ្ឋបាលបដិសេធមិនអនុញ្ញាតឲ្យក្រុមហ៊ុនអាមេរិក នៅក្នុងវិស័យទាំងនេះ «ត្រូវបានបញ្ឈប់អាជីវកម្ម» ដោយឲ្យបោះបង់ចោលការនាំចេញរបស់ចិន ដែលត្រូវបានសម្របសម្រួល។

ប៉ុន្តែការប្រកាសពន្ធរបស់លោក Biden នៅក្នុងខែឧសភា មិនបានកែប្រែកាតព្វកិច្ចពន្ធរហូតដល់ ២៥ភាគរយលើការនាំចូលពីចិន ដែលមានតម្លៃរាប់រយពាន់លានដុល្លារ រាប់ចាប់ពីប្រដាប់ក្មេងលេង រហូតដល់រ៉ោតទ័រអ៊ីនធឺណិត ដែលត្រូវបានដាក់ដោយលោក Trump ក្នុងឆ្នាំ២០១៨ និងឆ្នាំ២០១៩ ក្រោមការស៊ើបអង្កេត «Section 301» ជុំវិញការក្លែងបន្លំរបស់ចិនលើកម្មសិទ្ធិបញ្ញារបស់សហរដ្ឋអាមេរិក។

នៅពេលត្រូវបានសួរអំពីសំណើរបស់លោក Trump ក្នុងការយកពន្ធ ១០ភាគរយលើទំនិញទាំងអស់ដែលនាំចូលសហរដ្ឋអាមេរិក និង ៦០ភាគរយ ឬច្រើនជាងនេះលើទំនិញរបស់ចិន លោកស្រី Yellen បាននិយាយថា ការធ្វើបែបនោះនឹងប៉ះពាល់ដល់ដៃគូពាណិជ្ជកម្មទាំងអស់ និងពាណិជ្ជកម្មរបស់យើងទាំងអស់៕