​អង់គ្លេស៖ យន្តហោះ​មួយ​គ្រឿង​ដែល​ដឹក​ជនជាតិ​អង់គ្លេស ​និង​ជនជាតិ​អា​ហ្វ​ហ្គា​នី​ស្ថាន​មកពី​អា​ហ្វ​ហ្កា​នី​ស្ថាន​បាន​ចុះចត​នៅ​មូលដ្ឋាន​កងទ័ពអាកាស Royal Air Force station ក្នុង​ប្រទេស​អង់គ្លេស​កាលពី​យប់​ថ្ងៃ​អង្គារ​ ខណៈ​ដែល​ដំណើរការ​ជម្លៀស​នៅតែ​បន្ត​។​

​ជើង​ហោះហើរ​លើកដំបូង​របស់​ជនជាតិ​អង់គ្លេស និង​បុគ្គលិក​ស្ថានទូត​បាន​ទៅដល់​កាលពី​យប់​ថ្ងៃអាទិត្យនៅភូមិ Brize Norton ដែល​ជា​មូលដ្ឋាន​ទ័ពអាកាស Royal Air Force airbase នៅ​តំបន់ Oxfordshire ចម្ងាយ​ប្រហែល ១២០​គីឡូម៉ែត្រ​ភាគ​ពាយព្យ​នៃ​ទីក្រុង​ឡុង​ដ៍​។​ មន្ត្រី​ម្នាក់​ដែល​ទទួល​ខុសត្រូវ​ក្នុង​ការ​ជម្លៀស​ប្រជាជន​អង់គ្លេស​ពី ៦.០០០ ទៅ ៧.០០០​នាក់​ពី​អា​ហ្វ​ហ្គា​នី​ស្ថាន​បាន​និយាយ​កាលពី​ព្រឹក​ថ្ងៃ​អង្គា​រថា​ មេបញ្ជាការ​តា​លី​បង់​នៅ​ជុំវិញ​អាកាសយានដ្ឋាន​ក្នុង​ទីក្រុង​កា​ប៊ុល ​មិន​បាន​រំខាន​ដល់​កិច្ចប្រឹងប្រែង​នេះ​ទេ​។​ កាលពី​ថ្ងៃ​អង្គារ លោកនាយក​រដ្ឋមន្ត្រី Boris Johnson បាន​ប្រកាស​ពី​គម្រោង​ផ្ដល់​កន្លែង​ស្នាក់នៅ​ថ្មី ​សម្រាប់​ពលរដ្ឋ​អា​ហ្វ​ហ្គា​នី​ស្ថាន​។​

​ចំណែក​ជើង​ហោះហើរ​រប​ស់​ប្រទេស​បារាំង​ ដែល​បាន​ដឹក​មនុស្ស​ចំនួន​ ៤១​នាក់​ពី​រដ្ឋធានី​កា​ប៊ុលបាន​មក​ដល់​អាកាសយានដ្ឋាន​ក្រុង​ប៉ារីស​កាលពី​ល្ងាច​ថ្ងៃ​អង្គារ​។​ អ្នក​ជម្លៀស​ជើង​ដំបូង​ទាំងនោះ​ ត្រូវ​បាន​នាំទៅ​មូលដ្ឋាន​ទ័ពអាកាស​នៅ​ទីក្រុង​អា​ប៊ូ​ដា​ប៊ីរបស់​អារ៉ាប់​រួម ហើយ​អ្នកដំណើរ​មួយ​ចំនួន​ទៀតត្រូវ​បាន​បញ្ជូន​ត្រឡប់​ទៅ​ប្រទេស​បារាំង​វិញ​។​ យន្តហោះ​របស់​កងទ័ព​អាកាស​អ៊ីតាលី​មួយ​គ្រឿង​បាន​ចុះចត​នៅ​ទីក្រុង​រ៉ូម​កាលពី​ថ្ងៃ​ចន្ទ ​ដោយ​ដឹក​មនុស្ស ៧០​នាក់​រួម​ទាំង​អ្នកការទូត ​និង​ជនជាតិ​អាហ្វហ្គានីស្ថាន ​និង​ក្រុម​គ្រួសារ​របស់​ពួកគេ ​បន្ទាប់ពី​ការ​ចាក​ចេញ​ដ៏​គួរ​ឱ្យ​ភ័យខ្លាច​ពី​រដ្ឋធានី​កា​ប៊ុល​៕

អត្ថបទ៖ សុខមាន