លោក សែម ផល្លា នាយកបច្ចេកទេស នៃគណៈកម្មាធិការរៀបចំព្រឹត្តិការណ៍ម៉ារ៉ាតុងនៅកម្ពុជា បានចាត់ទុកកិច្ចសហការរវាង ម៉ារ៉ាតុងចក្រភពអង្គរ របស់កម្ពុជា និង តាលីម៉ារ៉ាតុង របស់ចិន គឺជាសញ្ញាណដ៏ល្អ នៃការបើកផ្លូវសម្រាប់ប្រជាជនចិន ក្នុងការត្រឡប់មកចូលរួមព្រឹត្តិការណ៍ម៉ារ៉ាតុងនៅកម្ពុជាច្រើនឡើងវិញ ។

ការគូសបញ្ជាក់នេះ ធ្វើឡើងក្នុងសន្និសីទសារព័ត៌មាន ស្ដីពីទិវារត់ប្រណាំងម៉ារ៉ាតុងអន្ដរជាតិ ចក្រភពអង្គរ លើកទី៩ នៅទីស្នាក់ការគណៈកម្មាធិការជាតិអូឡាំពិកកម្ពុជា កាលពីថ្ងៃទី២០ ខែមិថុនា ក្រោមវត្តមានឯកឧត្តម វ៉ាត់ ចំរើន អគ្គលេខាធិការគណៈកម្មាធិការជាតិអូឡាំពិកកម្ពុជា និងជារដ្ឋលេខាធិការក្រសួងអប់រំ យុវជន និងកីឡា ខណៈព្រឹត្តិការណ៍រត់ចម្ងាយ ៤២គីឡូម៉ែត្រនេះ នឹងប្រព្រឹត្តទៅ នាថ្ងៃទី០៤ ខែសីហា ឆ្នាំ២០២៤ ខាងមុខ។

អ្នកជំនាញដដែលបន្ដថា លោកពិតជាត្រេកអរ និងគាំទ្រ រាល់កិច្ចសហការជាតិ ឬអន្ដរជាតិ ដើម្បីកៀគរអ្នករត់មកពីជុំវិញពិភពលោក ដែលបង្កើនចំនួនអ្នករត់ឲ្យកាន់តែច្រើន ស្របតាមគោលបំណងសំខាន់របស់គណៈកម្មរៀបចំ ។ ម្យ៉ាងវិញទៀត ក៏ជាឱកាសដើម្បីសិក្សារៀនសូត្រពីគ្នាទៅវិញទៅមកផងដែរ ជាក់ស្ដែងដូចជាកិច្ចសហការជាមួយព្រឹត្តិការណ៍តាលីម៉ារ៉ាតុង របស់ចិន នេះជាដើម ។

លោក សែម ផល្លា បានបន្ថែមទៀតថា កាលពីមុន មានប្រជាជនចិនចូលរួមច្រើន បានចូលរួមព្រឹត្តិការណ៍ម៉ារ៉ាតុងនៅកម្ពុជា តែក្រោយផ្ទុះវិបត្តិកូវីដ-១៩ អ្នករត់ជាជនជាតិចិន បានធ្លាក់ចុះជាខ្លាំង ក្នុងរង្វង់ក្រោម ១០០នាក់ ។ ដូច្នេះតាមរយៈកិច្ចសហការ រវាងម៉ារ៉ាតុងចក្រភពអង្គរ និង តាលីម៉ារ៉ាតុង នេះ គឺជាការបើកផ្លូវមួយ ដើម្បីទាក់ទាញប្រជាជនចិនមកចូលរួមរត់នៅកម្ពុជាកាន់តែច្រើនឡើងវិញ ។

ឯកឧត្តម វ៉ាត់ ចំរើន បានឲ្យដឹងថា មកទល់ពេលនេះ មានអត្តពលិកប្រមាណជិត ១,៤០០នាក់ហើយ ដែលបានចុះឈ្មោះចូលរួមទិវារត់ប្រណាំងម៉ារ៉ាតុងអន្ដរជាតិ ចក្រភពអង្គរ លើកទី៩ នាដើមខែសីហាខាងមុខ ។ រីឯកិច្ចសហការជាមួយព្រឹត្តិការណ៍តាលីម៉ារ៉ាតុង ក៏ចាប់ផ្ដើមអនុវត្តផងដែរ ដោយភាគីចិន បាននឹងកំពុងរៀបចំអត្តពលិកអាជីព និងស្ម័គ្រចិត្តមកចូលរួម ដោយឯកឧត្តមបណ្ឌិត ថោង ខុន ទេសរដ្ឋមន្ដ្រី និងជាប្រធាន NOCC បានជំរុញឲ្យមានការចូលរួមយ៉ាងហោច ៥០០នាក់ ។ ដូច្នេះទម្រាំដល់ថ្ងៃកម្មវិធី ឯកឧត្តមរំពឹងថា ព្រឹត្តិការណ៍ម៉ារ៉ាតុងចក្រភពអង្គរឆ្នាំនេះ នឹងមានអ្នកចូលរួមសរុបយ៉ាងហោច ៣ពាន់នាក់ ។

គួរដឹងថា ទិវារត់ប្រណាំងម៉ារ៉ាតុងអន្ដរជាតិ ចក្រភពអង្គរ ឆ្នាំនេះ នឹងរៀបចំឡើងចំនួន ៤វិញ្ញាសា រួមមានរត់ចម្ងាយ ៤២គីឡូម៉ែត្រ, ២១គីឡូម៉ែត្រ, ១០គីឡូម៉ែត្រ និងរត់កម្សាន្ដ ៣គីឡូម៉ែត្រ ។ ព្រឹត្តិការណ៍នេះ រៀបចំឡើង ដើម្បីចូលរួមលើកកម្ពស់ភ្ញៀវទេសចរ និងប្រតិបត្តិករទេសចរណ៍ ក៏ដូចជាជួយដល់សេដ្ឋកិច្ចក្រៅប្រព័ន្ធ ដែលកំពុងរកស៊ីជួបការលំបាក ក្នុងរដូវកភ្លៀង ។ ម្យ៉ាងក៏ដើម្បីកៀគរថវិកាជួយដល់មន្ទីរពេទ្យគន្ធបុប្ផាផងដែរ ៕អត្ថបទ លី ឈុនឡា