នាយករដ្ឋមន្រ្តីឥណ្ឌា លោក Narendra Modi នៅថ្ងៃសុក្រ (ទី២១ ខែមិថុនា) នេះ បានប្រារព្ធទិវាយោហ្គាអន្តរជាតិ (International Day of Yoga) ដោយការធ្វើលំហាត់ប្រាណតាមបែបយោហ្គា នៅក្នុងទីក្រុង Srinagar នៃតំបន់ Kashmir របស់ប្រទេសឥណ្ឌា។

ក្នុងពិធីនោះ លោក Modi បានធ្វើលំហាត់ដកដង្ហើម និងសមាធិ នៅមជ្ឈមណ្ឌលសន្និសីទអន្តរជាតិ Sher-i-Kashmir ជាមួយអ្នកស្រុកមួយចំនួន។ ចំណែកមនុស្សម្នាជាច្រើននាក់ផ្សេងទៀត បានជួបជុំគ្នា នៅជិតបឹង Dal Lake ដើម្បីប្រារព្ធពិធីនេះផងដែរ។

ដោយមានដើមកំណើតនៅប្រទេសឥណ្ឌា យោហ្គា រួមមានលំហាត់ប្រាណជាច្រើនបែប ការធ្វើឥរិយាបថរាងកាយ និងសមាធិ ដោយការធ្វើបែបនោះមានបំណងឲ្យទទួលបាននូវសុខុមាលភាពផ្លូវកាយ ផ្លូវចិត្ត និងបញ្ញាវិញ្ញាណ។

គួរបញ្ជាក់ថា អង្គការសហប្រជាជាតិ បានប្រកាសយកថ្ងៃទី២១ ខែមិថុនា ជាទិវាយោហ្គាអន្តរជាតិ ក្នុងឆ្នាំ២០១៤ បន្ទាប់ពីខ្លួនបានអនុម័តវិធានការមួយ ដែលស្នើឡើងដោយលោក Modi៕