ក្រុមអ្នកជំនាញរបស់អង្គការសហប្រជាជាតិ កាលពីថ្ងៃព្រហស្បតិ៍នេះ បានព្រមានក្រុមហ៊ុនផលិតអាវុធ និងគ្រាប់រំសេវ ប្រឆាំងនឹងការចូលរួមក្នុងការបញ្ជូនអាវុធទៅឲ្យអ៊ីស្រាអែល ដោយនិយាយថា វាអាចធ្វើឲ្យពួកគេពាក់ព័ន្ធក្នុងការរំលោភសិទ្ធិមនុស្ស និងរំលោភច្បាប់អន្តរជាតិ។

ក្រុមអ្នកជំនាញចំនួន ៣០នាក់ រួមទាំងអ្នករាយការណ៍ពិសេសរបស់អង្គការសហប្រជាជាតិមួយចំនួន បាននិយាយថា ក្រុមហ៊ុនផលិតអាវុធដែលផ្គត់ផ្គង់អ៊ីស្រាអែល គួរតែបញ្ឈប់ការបញ្ជូនសម្ភារៈសង្រ្គាមរបស់ពួកគេ «បើទោះបីជាពួកគេ ត្រូវបានប្រតិបត្តិក្រោមអាជ្ញាប័ណ្ណនាំចេញដែលមានស្រាប់ក៏ដោយ» ។

ក្រុមអ្នកជំនាញនោះ បាននិយាយនៅក្នុងសេចក្តីថ្លែងការណ៍មួយថា៖« តាមរយៈការបញ្ជូនសព្វាវុធ គ្រឿងបន្លាស់ និងគ្រាប់រំសេវទៅឲ្យកងកម្លាំងអ៊ីស្រាអែល ក្រុមហ៊ុនទាំងនេះ ប្រថុយប្រថាននឹងការជាប់ពាក់ព័ន្ធក្នុងការរំលោភយ៉ាងធ្ងន់ធ្ងរលើសិទ្ធិមនុស្សអន្តរជាតិ និងច្បាប់មនុស្សធម៌អន្តរជាតិ»។

ពុំមានការអត្ថាធិប្បាយភ្លាមៗពីអ៊ីស្រាអែល ដែលបានបដិសេធម្តងហើយម្តងទៀត នូវការរំលោភបំពានក្នុងអំឡុងពេលប្រតិបត្តិការរបស់ខ្លួននៅតំបន់ហ្កាហ្សា ដោយនិយាយថា ខ្លួនកំពុងធ្វើសកម្មភាព ដើម្បីការពារខ្លួន និងកំពុងប្រយុទ្ធជាមួយក្រុមសកម្មប្រយុទ្ធហាម៉ាស មិនមែនប្រជាជនប៉ាឡេស្ទីននោះទេ។