សមាគមក្រុមសិទ្ធិមនុស្ស និងក្រុមឃ្លាំមើលនគរបាល បានប្រាប់ឲ្យដឹងថា មនុស្សម្នាក់ បានបាត់បង់ជីវិត និងយ៉ាងហោចណាស់ ២០០នាក់ បានរងរបួសទូទាំងប្រទេសកេនយ៉ា ក្នុងការតវ៉ាពាសពេញប្រទេស កាលពីថ្ងៃព្រហស្បតិ៍ (ទី២០ ខែមិថុនា) ប្រឆាំងនឹងផែនការរបស់រដ្ឋាភិបាលក្នុងការដំឡើងពន្ធបន្ថែមចំនួន ២,៧ពាន់លានដុល្លារ។

គួរបញ្ជាក់ថា នៅក្នុងសេចក្ដីថ្លែងការរួមមួយ នាល្ងាចថ្ងៃព្រហស្បតិ៍នោះ សមាគមសិទ្ធិមនុស្សចំនួន ៥ក្រុម ដែលរួមមានទាំងអង្គការលើកលែងទោសអន្តរជាតិ និងសមាគមវេជ្ជសាស្ត្រកេនយ៉ា បានឲ្យដឹងថា នគរបាលបានបាញ់ឧស្ម័នបង្ហូរទឹកភ្នែក និងកាណុងបាញ់ទឹក ដើម្បីបំបែកក្រុមអ្នកតវ៉ា នៅក្នុងរដ្ឋធានីណៃរ៉ូប៊ី។

ពួកគេបាននិយាយថា ការឃើញមានសំបកគ្រាប់កាំភ្លើង បានន័យថា មានការប្រើប្រាស់គ្រាប់ពិត ដោយសមាគមបានបន្ថែមថា បាតុករជាង ១០០នាក់ ត្រូវបានចាប់ខ្លួន នៅទូទាំងប្រទេសកេនយ៉ា។

អាជ្ញាធរត្រួតពិនិត្យការអនុវត្តច្បាប់ឯករាជ្យ (IPOA) នៅថ្ងៃសុក្រ (ទី២១ ខែមិថុនា) បានឲ្យដឹងថា ខ្លួនបានកត់ត្រាពីការស្លាប់របស់បុរសម្នាក់ «ដែលត្រូវបានចោទប្រកាន់ថា ដោយសារការបាញ់ប្រហាររបស់នគរបាល និងពីការរងរបួសធ្ងន់ធ្ងរជាច្រើនរបស់បាតុករផ្សេងទៀត ក្នុងនោះរួមទាំងមន្រ្តីនគរបាលផងដែរ»៕