ប្រទេសកោះស៊ីប បាននិយាយកាលពីថ្ងៃព្រហស្បតិ៍ថា ខ្លួនមិនជាប់ពាក់ព័ន្ធក្នុងមធ្យោបាយណាមួយ ក្នុងជម្លោះនៅមជ្ឈិមបូព៌ានោះទេ ដោយបានច្រានចោលការអះអាងដែលធ្វើឡើងដោយមេដឹកនាំក្រុមហេសបូឡា នៅប្រទេសលីបង់ លោក Sayyed Hassan Nasrallah ។

ដោយឆ្លើយតបទៅនឹងការគំរាមកំហែងដោយផ្ទាល់របស់លោក Nasrallahថា ប្រទេសកោះស៊ីប អាចនឹងក្លាយទៅជាគោលដៅស្របច្បាប់ ប្រសិនបើប្រទេសនេះ ចូលរួមជាមួយអ៊ីស្រាអែល ក្នុងការវាយប្រហារដ៏មានសក្តានុពលណាមួយប្រឆាំងនឹងអង្គការរបស់ខ្លួន នៅក្នុងប្រទេសលីបង់ ប្រធានាធិបតីកោះស៊ីប លោក Nikos Christodoulides បាននិយាយថា ប្រទេសកោះស៊ីប «មិនមែនជាផ្នែកនៃបញ្ហានោះទេ» ហើយ «គឺជាផ្នែកមួយនៃដំណោះស្រាយ»។

លោកបានចង្អុលបង្ហាញពីតួនាទីរបស់ប្រទេសកោះស៊ីប ក្នុងការផ្តល់ច្រករបៀងមនុស្សធម៌សម្រាប់ការបញ្ជូនជំនួយមនុស្សធម៌ពីទីក្រុង Larnaca ទៅកាន់តំបន់ហ្កាហ្សា ដែលជាសមិទ្ធិផលដែលលោក និយាយថា «មិនត្រឹមតែត្រូវបានទទួលស្គាល់ដោយពិភពលោកអារ៉ាប់ប៉ុណ្ណោះ ប៉ុន្តែថែមទាំងសហគមន៍អន្តរជាតិទាំងមូល»។

លោក Nasrallah បានប្រកាសកាលពីថ្ងៃពុធនៅក្នុងសុន្ទរកថាតាមទូរទស្សន៍ថា៖«រដ្ឋាភិបាលកោះស៊ីបត្រូវតែត្រូវបានព្រមានថា ការបើកអាកាសយានដ្ឋាន និងមូលដ្ឋានសម្រាប់សត្រូវអ៊ីស្រាអែល ដើម្បីកំណត់គោលដៅប្រទេសលីបង់ មានន័យថា រដ្ឋាភិបាលកោះស៊ីប បានក្លាយជាផ្នែកមួយនៃសង្គ្រាម ហើយការតស៊ូ (ក្រុមហេសបូឡា) នឹងដោះស្រាយបញ្ហានេះ ជាផ្នែកមួយនៃសង្គ្រាម»។