អង្គការសុខភាពពិភពលោក (WHO) នៅថ្ងៃសុក្រ (ទី២១ ខែមិថុនា) នេះ បានព្រមានថា អាកាសធាតុឡើងក្ដៅសឹងទ្រាំមិនបាន នៅតំបន់ហ្កាហ្សាស្ទ្រីប អាចធ្វើឲ្យបញ្ហាសុខភាពកាន់តែធ្ងន់ធ្ងរឡើងៗ សម្រាប់ប្រជាជនប៉ាឡេស្ទីនដែលភៀសខ្លួនពីការទម្លាក់គ្រាប់បែករបស់អ៊ីស្រាអែល និងការប្រយុទ្ធគ្នាយ៉ាងខ្លាំងក្លា រវាងកងកម្លាំងរបស់ប្រទេសនេះ និងក្រុមសកម្មប្រយុទ្ធហាម៉ាស។

កម្មវិធីស្បៀងអាហារពិភពលោក បានព្រមានថា វិបត្តិសុខភាពសាធារណៈដ៏ធំមួយ កំពុងកើតមាននៅក្នុងតំបន់ហ្កាហ្សា ដោយសារតែកង្វះខាតទឹកស្អាត អាហារ និងការផ្គត់ផ្គង់ផ្នែកវេជ្ជសាស្រ្ត។

អ្នកតំណាង WHO ប្រចាំនៅតំបន់ហ្កាហ្សា និងតំបន់វ៉េសប៊ែង គឺលោក Richard Peeperkorn បាននិយាយថា៖ «យើងបានឃើញការផ្លាស់ទីលំនៅយ៉ាងច្រើន ក្នុងរយៈពេលប៉ុន្មានសប្តាហ៍ និងប៉ុន្មានខែចុងក្រោយនេះ ហើយយើងដឹងថា ការរស់នៅឡូកឡំគ្នា និងកម្ដៅ អាចបណ្តាលឲ្យមានជំងឺកើនឡើង»។

លោកបានបន្ថែមថា៖ «យើងឃើញមានទឹកកខ្វក់ ដោយសារតែទឹកឡើងក្តៅ ហើយយើងនឹងឃើញមានអាហារខូចកាន់តែច្រើនឡើង ដោយសារតែសីតុណ្ហភាពឡើងខ្ពស់។ យើងនឹងឃើញមានពពួកសត្វល្អិត ដូចជាមូស និងរុយ ព្រមទាំងការខ្សោះជាតិទឹក និងជំងឺសុរិយរោគ (ការមានអាការសន្លប់ដោយសារកម្ដៅ)»។

គួរបញ្ជាក់ថា កម្ដៅក្ដៅខ្លាំង បានសម្លាប់មនុស្សរាប់រយនាក់ នៅទូទាំងពិភពលោក នៅពេលដែលរដូវក្តៅនៅអឌ្ឍគោលខាងជើង ចាប់ផ្តើម។ ហើយលោក Peeperkorn បានប្រាប់បន្ថែមទៀតថា នៅតំបន់ហ្កាហ្សា ដោយសារតែស្ថានភាពទឹក និងអនាម័យមិនល្អ ករណីនៃការរាករូស គឺខ្ពស់ជាងធម្មតា ២៥ដង៕