ប្រព័ន្ធផ្សព្វផ្សាយរដ្ឋ បានរាយការណ៍ថា ចំនួនអ្នកស្លាប់ដោយសារភ្លៀងធ្លាក់ខ្លាំង និងទឹកជំនន់ នៅក្នុងខេត្តក្វាងទុង ភាគខាងត្បូងប្រទេសចិន ក្នុងសប្តាហ៍នេះ បានកើនឡើងដល់ ៣៨ នាក់ គិតត្រឹមថ្ងៃសុក្រ។ ប្រទេសចិន បានទប់ទល់ទៅនឹងអាកាសធាតុក្តៅខ្លាំងក្នុងរដូវក្តៅនេះ ខណៈទឹកជំនន់ជន់លិចនៅភាគខាងត្បូងបានកើតឡើង ក្នុងពេលរលកកម្ដៅបានវាយបក់នៅទូទាំងភាគខាងជើង។

ភ្លៀងធ្លាក់នៅខេត្តក្វាងទុងដែលមានប្រជាជនរស់នៅច្រើនក្នុងសប្តាហ៍នេះ បានបង្កឱ្យមានទឹកជំនន់ និងបំណាក់ដី ដោយតំបន់មួយចំនួនមានការជន់លិចខ្លាំង។

អាជ្ញាធរ បាននិយាយថា មនុស្ស៩នាក់ បានស្លាប់នៅជុំវិញទីក្រុង ម៉ីចូវ(Meizhou) បណ្តាលឲ្យចំនួនអ្នកស្លាប់កើនឡើងដល់៣៨ នាក់ នៅខេត្តក្វាទុង គិតត្រឹមរសៀលថ្ងៃសុក្រ។

ទូរទស្សន៍រដ្ឋ CCTV បាននិយាយថា ដោយសារតែភាពធ្ងន់ធ្ងរនៃគ្រោះមហន្តរាយ ការស្វែងរកនិងជួយសង្គ្រោះមនុស្សដែលជាប់គាំង មានការពិបាក និងប្រើពេលវេលាយូរ។

ប្រព័ន្ធផ្សព្វផ្សាយ និយាយថាមនុស្សជាង៥៥.០០០នាក់ បានរងផលប៉ះពាល់ដោយភ្លៀងធ្លាក់ ហើយលំនៅឋានជាង ២.២០០០ខ្នងនិងផ្លូវជិត៤.៧០០កន្លែង បានបាក់រលំ និងរងការខូចខាត។

យោងតាមទូរទស្សន៍ CCTV បានឱ្យដឹងថា គ្រោះមហន្តរាយនេះ ក៏បានបំផ្លាញស្ថានីយ៍អគ្គិសនីរាប់រយ កន្លែងនិងបំពង់បង្ហូរទឹក ព្រមទាំងដំណាំជិត៧.០០០ហិកតា។

ទូរទស្សន៍រដ្ឋ បាននិយាយថា ការខាតបង់សេដ្ឋកិច្ចដោយផ្ទាល់ បណ្តាលមកពីទឹកជំនន់ត្រូវបានគេប៉ាន់ប្រមាណថាមានចំនួន៨០៥,៧ លានដុល្លារអាមេរិក។