នាព្រឹកថ្ងៃទី២១ ខែមិថុនា ឆ្នាំ២០២៤ គណៈប្រតិភូគណៈកម្មការសុខាភិបាល សង្គមកិច្ច អតីតយុទ្ធជន និងយុវនីតិសម្បទា ការងារ និងបណ្តុះបណ្តាលវិជ្ជាជីវៈ និងកិច្ចការនារីនៃរដ្ឋសភា (គណៈកម្មការទី៨នៃរដ្ឋសភា) ដឹកនាំដោយ លោកជំទាវ ឡោក ខេង ប្រធានគណៈកម្មការ បានជួបប្រជុំពិភាក្សាការងារជាមួយឯកឧត្តម ថុង ណារុង ប្រធានក្រុមប្រឹក្សាខេត្ត ដើម្បីចុះពិនិត្យការអនុវត្តច្បាប់ និងគោលនយោបាយនានារបស់រាជរដ្ឋាភិបាលពាក់ព័ន្ធនឹងវិស័យទាំង៤ ដែលគណៈកម្មការទទួលបន្ទុក នៅសាលប្រជុំសាលាខេត្តកោះកុង ។

លោកជំទាវ ឡោក ខេង បានលើកឡើងពីគោលបំណងក្នុងការតាមដានការអនុវត្តច្បាប់ និងដើម្បីលើកកម្ពស់ការអនុវត្តនូវគោលនយោបាយរបស់រាជរដ្ឋាភិបាលអណ្ណតិទី៧នៃរដ្ឋសភា ដោយបានដាក់ចេញយុទ្ធសាស្រ្តបញ្ចកោណដំណាក់កាលទី១ ដែលផ្តោតសំខាន់ទៅលើ កំណើនការងារ សមធម៌ ប្រសិទ្ធភាព និងចីរភាព ដើម្បីកសាងមូលដ្ឋានគ្រឹះឆ្ពោះទៅសម្រេចចក្ខុវិស័យកម្ពុជាក្នុងឆ្នាំ២០៣០ និងឆ្នាំ២០៥០ ។

ក្នុងឱកាសនោះឯកឧត្តម ស្រេង ហុង អភិបាលស្តីទីបានបង្ហាញពីវឌ្ឍនភាពការងារ និងហេដ្ឋារចនាសម្ព័ន្ធនានា ដែលខេត្តបានធ្វើកន្លងមកក្នុងនោះក៏មានវិស័យសុខាភិបាល សង្គមកិច្ច អតីតយុទ្ធជន និងយុវនីតិសម្បទា ការងារ និងបណ្តុះបណ្តាលវិជ្ជាជីវៈ និងកិច្ចការនារីផងដែរ ។

ឯកឧត្តមអភិបាលស្រីទីបានបន្តទៀតថា វិស័យការងារ និងបណ្តុះបណ្តាលវិជ្ជាជីវៈបានចុះបញ្ជីតាមសហគ្រាសគ្រឹះស្ថានក្នុងខេត្តសរុបចំនួន៧៦ ដែលមានកម្មករ និយោ ជិតកំពុងបម្រើការងារសរុបចំនួន១៤.៦១៦នាក់ ក្នុងនោះមានកម្មករបរទេសចំនួន ២.០៤២នាក់ និងបានចុះតាមដាន ផ្សព្វផ្សាយ និងបណ្តុះបណ្តាលវាសន្តិសុខសង្គមទាំងបួនផ្នែកដូចជា៖ ផ្នែកហានិភ័យការងារ ផ្នែកថែទាំ ផ្នែកសោធន (បង់ភាគទានផ្នែកសោធនស្ម័ក្រចិត្ត) និងស្វ័យនិយោជន៍ ។ ចំពោះវិស័យសង្គមកិច្ច អតីតយុទ្ធជន និងយុវនីតិសម្បទា បានសហការជាមួយមន្ទីរសុខាភិបាលនៃរដ្ឋ បាលខេត្ត និងអាជ្ញាធរឃុំ សង្កាត់ អនុវត្តកម្មវិធី ឧបត្ថម្ភសាច់ប្រាក់ជូនស្ត្រីមានផ្ទៃពោះ និងកុមារអាយុក្រោម២ឆ្នាំ គ្រួសារក្រីក្រ និងងាយរងគ្រោះ ក្នុងអំឡុងពេលជំងឺកូវីដ-១៩ ទូទាំងខេត្ត ។ ឯកឧត្តមបានបន្ថែមទៀតថា វិស័យសុខាភិបាល បានពិនិត្យ និងពិគ្រោះជំងឺក្រៅសរុបចំនួន ៧.៣០៤៨ ករណី (ករណីថ្មីចំនួ៦៦.៩៧៩ករណី) បានផ្តល់សេវាការព្យាបាលអ្នកជំងឺ ដោយសម្រាកពេទ្យ ផ្តល់សេវាសម្រាលកូន ផ្តល់សេវាជូនស្ត្រីមានផ្ទៃពោះ មកពិនិត្យផ្ទៃពោះមុនសម្រាល និងក្រោយសម្រាល និងចាក់ថ្នាំបង្ការជំងឺ១១មុខជូនកុមារ ។ ចំណែកវិស័យកិច្ចការនារីបានផ្សព្វផ្សាយ និងបើកវគ្គបណ្តុះបណ្តាលសិស្សចូលរៀនជំនាញធ្វើអំបោសស្មៅត្រែង សំអាងកាយ និងកាត់ដេរសំលៀកបំពាក់ដល់ស្ត្រីក្រីក្រ ក្មេងស្រីបោះបង់ ការសិក្សា និងស្ត្រីរងគ្រោះដោយអំពើហិង្សា និងបើកវេទិកាផ្សព្វផ្សាយជាច្រើននៅក្នុងតំបន់សេដ្ឋ កិច្ចពិសេសខេត្តកោះកុង ។

ឯកឧត្តមអភិបាលខេត្តស្តីទីបានលើកឡើងពីបញ្ហាប្រឈមនានា ដែលខេត្តបានជួបប្រទះនាពេលកន្លងមកមានកង្វះខាតធនធានមនុស្ស និងបច្ចេកទេស កង្វះខាតឱសថ និងសម្ភារៈបរិក្ខាពេទ្យ ម្ចាស់សហគ្រាស និងនិយោជកមួយចំនួនមិនទាន់បានយល់ច្បាស់អំពីច្បាប់ ប.ស.ស ការប្រែប្រួលអាកាសធាតុ គ្រោះធម្មជាតិ នាំឱ្យប្រជាពលរដ្ឋធ្វើចំណាកស្រុក ។

បន្ទាប់ពីបានស្ដាប់របាយការណ៍ខេត្តរួចមក លោកជំទាវឡោក ខេង បានថ្លែងអំណរគុណ និងកោតសរសើរដល់អាជ្ញាធរខេត្ត ដែលខិតខំបំពេញភារកិច្ចជូនប្រជាពលរដ្ឋឱ្យស្របតាម​គោលនយោបាយ​ជាអាទិភាពរបស់រាជរដ្ឋាភិបាលដែលបានដាក់ចេញ ក្នុងការផ្តល់សេវា​សុខាភិបាល​សម្រាប់ពង្រឹងប្រព័ន្ធគាំពារសង្គម ជំនួយសង្គម និងសន្តិសុខសង្គម ការបណ្តុះបណ្តាល​វិជ្ជាជីវៈ បច្ចេកទេសជូនយុវជនក្រីក្រ ងាយរងហានិភ័យ ដោយឧបត្ថម្ភសាច់ប្រាក់ ២៨ម៉ឺនរៀល ក្នុងមួយខែ ធ្វើការពង្រឹងកម្មវិធីជាតិ ជំនួយសង្គមជួយដល់ជនក្រីក្រ និងជនងាយរងហានិភ័យ​ឱ្យទាន់ពេលវេលា ។

លោកជំទាវប្រធានគណកម្មការ បានស្នើសុំឱ្យមណ្ឌលសុខ ភាព និងមន្ទីរពេទ្យបង្អែកខេត្ត​ដាក់ប៉ាណូ និងចាក់វីដេអូអប់រំផ្សព្វផ្សាយពីការបង្កា និងរបបអាហារសម្រាប់ការពារជំងឺ​មិនឆ្លងជូនដល់​ប្រជាពលរដ្ឋមកទទួលសេវានៅតាមមន្ទីរពេទ្យ ព្រមទាំងស្នើសុំឱ្យមន្ទីរសុខាភិបាល មន្ទីរកិច្ចការនារីនិងមន្ទីរការងារ ត្រូវចូលរួមសហការគ្នាធ្វើការចុះផ្សព្វផ្សាយប្រយុទ្ធប្រឆាំងជំងឺ​មិនឆ្លងតាមរយៈគណៈទ្រទ្រង់សុខភាពភូមិ មុនបើកវេទិកាភូមិឃុំមានសុវត្ថិភាព និងធ្វើការចុះទៅ​ដល់ផ្ទះបងប្អូនប្រជាពលរដ្ឋនៅតាមភូមិឃុំ ដើម្បីផ្សព្វផ្សាយដល់យុវជនឲ្យមកចូលរៀននៅសាលា​បណ្ដុះបណ្ដាលពហុបច្ចេកទេសខេត្ត ដើម្បីឲ្យក្លាយទៅជាកម្មករជំនាញនិងទទួលបានប្រាក់ខែខ្ពស់ ។

លោកជំទាវបានបន្តទៀតថា មន្ទីរប.ស.ស ត្រូវតែពង្រឹងសមត្ថភាពភាពរបស់ខ្លួនក្នុងការផ្សព្វផ្សាយ​ពីសារៈសំខាន់នៃការប្រើប្រាស់ប័ណ្ណប.ស.សដល់បុគ្គលស្វ័យនិយោជន៍ឱ្យបានយល់ច្បាស់ និងចូលរួមជាមួយប.ស.ស ។