កំពង់ឆ្នាំង៖ ប្រជាពលរដ្ឋឃុំគោកបន្ទាយ ស្រុករលាប្អៀរ ខេត្តកំពង់ឆ្នាំង នៅថ្ងៃទី២២ ខែមិថុនា ឆ្នាំ២០២៤នេះ សប្បាយចិត្ត និងបានថ្លែងអំណរគុណដល់ប្រមុខរាជរដ្ឋាភិបាលកម្ពុជា សម្តេចធិបតី ហ៊ុន ម៉ាណែត នាយករដ្ឋមន្ត្រីដែលបានផ្តល់ផ្លូវមួយខ្សែប្រវែង១២៣៣ម៉ែត្រ តាមរយៈក្រសួងអភិវឌ្ឍន៍ជនបទ អោយប្រជាពលរដ្ឋធ្វើដំណើរទៅមក ដឹកកសិផលបានងាយស្រួល ចំណេញពេលវេលា និងសន្សំសំចៃថវិការក្នុងគ្រួសារ។

 ប្រជាពលរដ្ឋ៣នាក់បានថ្លែងថា៖ ផ្លូវនេះ ពីមុនជាផ្លូវកសាងពីដីក្រហម ពេលរដូវប្រាំងហុយខ្លាំងធ្វើអោយប៉ះពាល់ដល់សុខភាព និងនៅពេលរដូវវស្សាមានភក់ និងទឹកដក់លើផ្លូវ ធ្វើដំណើរទៅមកមានការលំបាកខ្លាំង ខាតពេលវេលា ខូចខាតទាំងមធ្យោបាយធ្វើដំណើរ។ មកដល់ដើមឆ្នាំ២០២៤នេះ ឯកឧត្តម ស៊ុន សុវណ្ណារិទ្ធិ អភិបាលខេត្តកំពង់ឆ្នាំង បានសំណើរសុំផ្លូវ១ខ្សែពីប្រមុខរាជរដ្ឋាភិបាល តាមរយៈក្រសួងអភិវឌ្ឍន៍ជនបទ មានផ្លូវកៅស៊ូប្រភេទDBSTកៅស៊ូ២ជាន់មួយកំណាត់ និងផ្លូវបេតុង១កំណាត់ ដែលមកដល់ថ្ងៃនេះ កសាងបានប្រមាណ៥០%ហើយ ដែលផ្លូវ១ខ្សែនេះ បានធ្វើអោយប្រជាពលរដ្ឋនៅតាមបណ្តោយផ្លូវ ក៏ដូចជាប្រជាពលរដ្ឋនៅតាមដងទន្លេ និងនៅតាមស្រុករលាប្អៀរ និងស្រុកជលគីរី ខេត្តកំពង់ឆ្នាំង សប្បាយចិត្តខ្លាំង និងបានថ្លែងអំណរគុណយ៉ាងខ្លាំងដល់ឯកឧត្តមអភិបាលខេត្ត ក្រសួងអភិវឌ្ឍន៍ជនបទ ជាពិសេសសម្តេចធិបតី ហ៊ុន ម៉ាណែត នាយករដ្ឋមន្ត្រី ដែលបានយកចិត្តទុកដាក់ ដឹងពីសុខទុក្ខប្រជាពលរដ្ឋនៅតាមទីជនបទដាច់ស្រយាល។

លោក សេង វិចិត្រ អភិបាលស្រុករលាប្អៀរ បានអោយដឹងថា៖ ផ្លូវមួយខ្សែនេះមានប្រវែង១២៣៣ម៉ែត្រ ស្ថិតក្នុងឃុំគោកបន្ទាយ ស្រុករលាប្អៀរ ខេត្តកំពង់ឆ្នាំង ។ ផ្លូវនេះ ជាផ្លូវគម្រោងពង្រឹងសមត្ថភាពផលិតភាពជនបទរបស់ក្រសួងអភិវឌ្ឍន៍ជនបទ ដោយបានកសាងឆ្លងកាត់ភូមិមានជ័យ ភូមិពពេលពក ភូមិអូរតាសេក ភូមិឈើត្រាច និងភូមិកងមាស ឃុំគោកបន្ទាយ ស្រុករលាប្អៀរ ។ ផ្លូវនេះ មានសារៈសំខាន់ណាស់សំរាប់ប្រជាកសិករដឹកកសិផលយកមកកាន់ទីផ្សារ និងទៅបណ្តាខេត្តផ្សេងៗ រួមនឹងការធ្វើដំណើរទៅមកឆ្លងកាត់ស្រុករលាប្អៀរ ស្រុកជលគីរី ខេត្តកំពង់ឆ្នាំង និងស្រុកបាធាយ ខេត្តកំពង់ចាម។ អត្ថប្រយោជន៍មួយទៀត សំរាប់ជួយដល់ជីវភាពប្រជាពលរដ្ឋក្នុងការចំណាយពេលធ្វើដំណើររបស់ពួកគាត់ សិស្សានុសិស្ស រួមនិងការដឹកអ្នកជម្ងឺទៅកាន់មណ្ឌលសុខភាព និងមន្ទីរពេទ្យបង្អែកបានងាយស្រួលរហ័សទាន់ចិត្តផងដែរ ៕ កាំង ហុងវាស្នា