ភ្នំពេញ៖ ប្រជាពលរដ្ឋ១គ្រួសារ ដែលជីវភាពខ្វះខាត ហើយប្រពន្ធបានសម្រាលកូន នៅមន្ទីរពេទ្យ​តេជោសន្តិភាព ត្រូវបានក្រុមការងារមនុស្សធម៌របស់មន្ទីរប្រឆាំងគ្រឿង​ នាំ​យក​អំណោយ​ចែកជូន​ដល់ពួកគាត់។

ក្រុមការងារមន្ទីរប្រឆាំងបទល្មើសគ្រឿងញៀន បានឲ្យដឹងថា ដោយមើលឃើញថា បុរសដែល​មានមុខរបរជាសន្តិសុខ មានជីវភាពទីទាល់ក្រ ដោយ​ប្រពន្ធរបស់​គាត់បាន​សម្រាលកូនមុនខែ (មិនទាន់គ្រប់ខែ) ​មានសុខភាពមិនល្អផងនោះ ដែល​មាន​ជីវភាពខ្វះខាតរក​ព្រឹកខ្វះល្ងាច មិនមានលទ្ធភាព ។

ភ្លាមៗនោះ ឯកឧត្តមឧត្តមសេនីយ៍ឯក ឃឹង សារ៉ាត់ បានចាត់តាំងក្រុមការងារ​ នៃមន្ទីរប្រឆាំង​បទល្មើស​គ្រឿងញៀន​ នាំ​យកអំណោយដ៏ថ្លៃថ្លារបស់ឯកឧត្តម នាយឧត្តមសេនីយ៍ ស ថេត អគ្គ​ស្នងការ​នគរបាលជាតិ ​ផ្តល់ជូនដល់​បុរសជា​សន្តិសុខ​ និងនារីជាប្រពន្ធ​ដែលកំពុងសម្រាលកូន​នៅក្នុងមន្ទីរពេទ្យ ​ហើយ​បាន​ទៅដល់ទី​កន្លែងផ្ទះស្នាក់​នៅបន្ថែមទៀត។ អំណោយរួមមាន៖ អង្ករ២បេ ទឹកត្រី ទឹកស៊ីអ៊ីវ និងទឹកដោះគោ រួមទាំងថវិកាចំនួន ១លានរៀល​ដើម្បីជួយ​សម្រាលបន្ទុក។

ក្រុមការងាររបស់មន្ទីរប្រឆាំងគ្រឿងញៀន បានបន្ថែមថា នេះជាទឹកចិត្តរបស់ថ្នាក់ដឹកនាំ ដែលតែង​តែ​យកចិត្តទុកដាក់ដល់ប្រជាពលរដ្ឋ ដែលមានការលំបាក​ ឬខ្វះខាត គឺ​មានថ្នាក់ដឹកនាំ​នៅ​ក្បែរជានិច្ច៕អត្ថបទ៖ កុម្ភះ