មូលនិធិ អ្នកឧកញ៉ាបណ្ឌិត ជា រតនា និងអ្នកឧកញ៉ា លីហៀក រតនា បានរៀបចំ​ពិធី​ជួប​ជុំ​ជន​ពិការ​កំបុតដៃទាំងពីរ ទូទាំងប្រទេស ឆ្នាំ២០២៤ ក្រោមអធិបតីភាព អ្នកឧកញ៉ាបណ្ឌិត ជា រតនា និងអ្នកឧកញ៉ា លីហៀក រតនា ដោយជនពិការកំបុតដៃទាំងពីរ ទទួលបានថវិកាចំនួន ១លាន​រៀល​ក្នុងម្នាក់។

បន្ទាប់ពីការប្រកាសអំពាវនាវ ដល់ជនពិការកំបុតដៃទាំងពីរទូទាំងប្រទេស មកទទួល​ការ​ឧបត្ថម្ភ​ពី​មូល​និធិ នៅព្រឹកថ្ងៃទី២២ ខែមិថុនា ឆ្នាំ២០២៤នេះ មូលនិធិអ្នកឧកញ៉ាបណ្ឌិត ជា រតនា និង​អ្នកឧកញ៉ា លីហៀក រតនា ព្រមទាំងសប្បុរសជននានា បានផ្ដល់អំណោយឧបត្ថម្ភជាថវិកា ក្នុង​ម្នាក់​មួយ​លានរៀល ដល់ជនពិការកំបុតដៃទាំងពីរចំនួន ១៧៧ និង ជនមានពិការភាព មិន​ស្ថិត​ក្នុង​លក្ខខណ្ឌ៨នាក់ផ្សេងទៀត ដែលប្រព្រឹត្ដទៅនៅសណ្ឋាគារ សាន់ & មូន រីវើសាយ ស្ថិត​នៅ​ជាប់​ស្ពាន​អាកាសក្បាលថ្នល់។

អ្នកឧកញ៉ាបណ្ឌិត ជា រតនា បានថ្លែងថាស្របតាមការអំពាវនាវរបស់មូលនិធិ នៅថ្ងៃនេះ មាន​សប្បរសជនជាច្រើនរូបបានចូលរួមបរិច្ចាគថវិកាផ្ទាល់ខ្លួន រួមគ្នាជាមួយមូលនិធី ដើម្បី​ផ្ដល់​អំណោយ​ជា​ថវិកាដល់ជនពិការកំប៉ុតដៃទាំងពីរ នៅទូទាំងប្រទេសលើកទី១៤។ អ្នក​ឧកញ៉ាបន្ដ​ថា​ក្រៅ​ពី​ផ្ដល់ថវិកាជូនគាត់ម្ដងក្នុងម្នាក់ ១លានរៀល មូលនិធិក៏បានជួយជាថវិកាដល់ពួកគាត់ សម្រាប់​យកទៅសិក្សារៀនសូត្រជំនាញច្បាស់លាស់ ដើម្បីប្រកបរបបចិញ្ចឹមជីវិត លើក​កម្ពស់​សេដ្ឋ​កិច្ចគ្រួសារ ខ្លះទៀតបានបន្ដការសិក្សាថ្នាក់បរិញ្ញាបត្ររហូតមានការងារធ្វើ។ មកដល់​ពេល​នេះ ជនពិការកំប៉ុតដៃទាំងពីរ មួយចំនួន មានភាពរឹងមាំទាំងស្មារតី និងជីវភាព ឈាន​ទៅ​ឯ​ករាជ្យ​លើ​ខ្លួនឯង ថែមទាំងអាចជួយដល់គ្រួសារថែមទៀតផង។ អ្នកឧកញ៉ាបន្តថា នេះជាផ្នែក​មួយ​ដែល​បាន​ចូលរួមចំនែកជួយទៅដល់រាជរដ្ឋាភិបាល តាមរយៈការលើកទឹកចិត្ត ការផ្តល់ឱកាស អោយ​ជន​មានពិការភាពអាចបន្តដំណើរជីវិតរបស់ពួកគេទៅមុខទៀត។ ទោះបីជាពួកគាត់​មាន​ពិការ​ភាព ប៉ុន្តែមិនពិការបេះដូង មានន័យថា ពួកគាត់មានសមត្ថភាពពិសេសដែលបុគ្គលទូទៅខ្លះ មិន​អាចធ្វើបាន ។ ជនពិការមិនមែនជាបន្ទុករបស់អ្នកណាម្នាក់នោះឡើយប្រសិនបើ ពួកគេ​ទទួលបា​ន​ការ​គាំទ្រ លើកទឹកចិត្ត និងការផ្តល់ឱកាស រៀនសូត្រចាប់យកចំណេះជំនាញ។ ផ្ទុយ​ទៅ​វិញ​ពួក​គេ​នឹង​ក្លាយជា ធនធានមនុស្សដ៏សំខាន់ដើម្បីចូលរួមចំណែកជួយដល់គ្រួសារ សង្គម និង ប្រទេស​ជាតិ​ទាំងមូល។

ជាក់ស្តែងតំណាងជនមានពិការភាពកំបុតដៃទាំង២ មួយចំនួនបានរៀនចប់ថ្នាក់បរិញ្ញាបត្រ អ្នក​ខ្លះ​កំពុង​រៀនឆ្នាំទី៣ អ្នកខ្លះជាសិល្បៈករផ្នែកគំនូរ ខ្លះជាអ្នកព័ត៌មានវិទ្យា ពួកគេសុទ្ធ​តែ​មាន​សមត្ថភាព​មិនចាញ់ ជនដែលគ្មានពិការភាព។ ដោយពួកគេបានថ្លែងអំណរគុណដល់ មូលនិធិ អ្នក​ឧកញ៉ាបណ្ឌិត ជា រតនា និងអ្នកឧកញ៉ា លីហៀក រតនា រួមនឹងសប្បុរជនគ្រប់រូប ដែល​បាន​ជួយ​ឧបត្ថម្ភដល់ពួកគេ ដោយបានយកថវិកានោះទៅរៀនសូត្របន្ត ខ្លះយកទៅធ្វើជាដើមទុន ចិញ្ចឹម​សត្វ ធ្វើកសិកម្ម មានជំនាញ មុខរបរច្បាស់លាស់ អាចជួយខ្លួនឯងបានដល់សព្វថ្ងៃនេះ។

សូមបញ្ជាក់ថា មកដល់ពេលនេះ ជនពិការកំបុតដៃទាំង២ ចំនួនជាង ៣០០នាក់ ដែលមកពី ២១ រាជធានី ខេត្ត ដែលទទួលបានការឧបត្ថម្ភពីមូលនិធិ អ្នកឧកញ៉ាបណ្ឌិត ជា រតនា និងអ្នកឧកញ៉ា លីហៀក រតនា ។ អ្នកឧកញ៉ាជារតនា នៅតែបន្តអំពាវនាវ ដល់​ជន​មាន​ពិការ​ភាព​កំបុត​ដៃ​ទាំង​២​ដោយ​មូល​ហេតុអ្វីក៏ដោយ ដែលមិនទាន់បានទទួលការឧបត្ថម្ភ អាចបន្ត​ទាក់​ទងមក​កាន់មូល​និធិ​ដើម្បី​ទទួល​បានថវិកា៕ អត្ថបទ ៖ សូដាវណ្ណ