កាលពីថ្ងៃទី២២ ខែមិថុនា ឆ្នាំ២០២៤ ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយក​រដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា អញ្ជើញចូលរួមជាអធិបតីក្នុង ពិធីពិព័រណ៍​ស្នាដៃសិស្ស​ប្រចាំឆ្នាំ២០២៤ របស់វិទ្យាល័យព្រះយុគន្ធរ និងវិទ្យាល័យព្រះស៊ីសុវត្ថិ សាលារៀនជំនាន់ថ្មី (NGS) និងមានការចូលរួមពីសំណាក់ ឯកឧត្តម លោកជំទាវថ្នាក់ដឹកនាំក្រសួង លោក លោកស្រី គណៈគ្រប់គ្រង បុគ្គលិកអប់រំ លោកគ្រូ អ្នកគ្រូ និងសិស្សានុសិស្ស។

ការរៀបចំពិព័រណ៍ស្នាដៃសិស្សនាពេលកន្លងមក ដែលមានដូចជា ការធ្វើពិសោធន៍អំពីសមិទ្ធផល ការអប់រំស្ទែម ផ្នែកវិទ្យាសាស្ដ្រ រ៉ូបូត ចំណតវៃឆ្លាត រូបវិទ្យា គីមីវិទ្យា ស្រាវជ្រាវបញ្ហាសង្គម និពន្ធសៀវភៅ និងការសម្ដែងសិល្បៈជាដើម គឺបានឆ្លុះបញ្ចាំងពីចំណេះដឹង ភាពច្នៃប្រឌិត និងសក្ដានុពលបញ្ញារបស់យុវជនកម្ពុជា។ ការរៀបចំពិព័រណ៍ស្នាដៃសិស្សនាពេលនេះ ក្នុងគោលបំណងដើម្បីលើកទឹកចិត្តដល់សិស្សានុសិស្ស មាតាបិតា និងអ្នកអាណាព្យាបាល ក៏ដូចជាសហគមន៍ ដើម្បីបង្កើនភាពជឿជាក់ និងទំនុកចិត្តលើគុណភាពអប់រំនៅក្នុងគ្រឹះស្ថានអប់រំសាធារណៈ។

ក្នុងឱកាសនេះ ឯកឧត្តមបណ្ឌិតសភាចារ្យ ឧបនាយករដ្ឋមន្ត្រី បានវាយតម្លៃខ្ពស់ និងថ្លែងអំណរគុណ ចំពោះគណៈគ្រប់គ្រងសាលារៀនជំនាន់ថ្មី វិទ្យាល័យស៊ីសុវត្ថិ វិទ្យាល័យព្រះយុគន្ធរ លោកគ្រូ អ្នកគ្រូ មាតាបិតា អ្នកអាណាព្យាបាល និងសិស្សានុសិស្ស ដែលបានចូលរួមគាំទ្រចំពោះសាលារៀនជំនាន់ថ្មី ដែលជាការសិក្សាបែបសតវត្សទី២១ ការសិក្សាបែបឌីជីថល និងបច្ចេកវិទ្យា ឆ្លើយតបនឹងយុទ្ធសាស្ត្របញ្ចកោណដំណាក់កាលទី១ របស់រាជរដ្ឋាភិបាលនីតិកាលទី៧ ក្រោមការដឹកនាំរបស់ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា ក្នុងការលើកកម្ពស់ការបណ្ដុះបណ្ដាលធនធានមនុស្ស ឱ្យមានទាំងចំណេះដឹង មានទាំងបំណិន ក៏ដូចជាជំនាញសតវត្សរ៍ទី២១ និងឥរិយាបថល្អ។

យោងតាមរបាយការណ៍របស់លោកនាយក ឯកឧត្តមបណ្ឌិតសភាចារ្យ ឧបនាយករដ្ឋមន្ត្រី បានលើកឡើងថា សាលារៀនជំនាន់ថ្មីពិតជានាំមកនូវការអប់រំប្រកបដោយគុណភាព និងប្រសិទ្ធភាព ដែលសិស្សានុសិស្ស នៃសាលារៀនជំនាន់ថ្មី មិនត្រឹមតែរៀននៅតែក្នុងថ្នាក់ប៉ុណ្ណោះទេ ប៉ុន្តែក៏បន្តរៀន និងស្រាវជ្រាវបន្ថែមនៅក្រៅម៉ោងសិក្សាផងដែរ ដែលនេះជាកត្តាប្រែក្លាយខ្លួនជាអ្នកសិក្សាមួយដែលមានឯករាជ្យភាព ត្រៀមខ្លួនរួចជាស្រេចសម្រាប់ការប្រលងមធ្យមសិក្សាទុតិយភូមិ និងបន្តការសិក្សាបន្តបន្ទាប់ទៀត។ លើសពីនេះ ឯកឧត្តមបណ្ឌិតសភាចារ្យ ឧបនាយករដ្ឋមន្ត្រី ក៏បានកោតសរសើរចំពោះសាលារៀនជំនាន់ថ្មី ដែលមានអត្រាសិស្សប្រលងជាប់សញ្ញាបត្រមធ្យមសិក្សាទុតិយភូមិរហូតដល់ជាង ៩៣% និងសិក្សាដែលទទួលបាននិន្ទេស A និង B ជិត៦០% ច្រើនជាងគេ និងមួយឆ្នាំសិស្សសាលានេះទទួលបានមេដាយពីការប្រកួតនានានៅអន្តរជាតិ សរុបជាង៦០០គ្រឿង ដែលនេះបញ្ជាក់ពីគុណភាពអប់រំនៃសាលារៀនជំនាន់ថ្មី ដើម្បីឱ្យសិស្សានុសិស្ស មានសមត្ថភាពគ្រប់គ្រាន់ និងត្រៀមខ្លួនរួចរាល់សម្រាប់ការសិក្សាបន្តទាំងក្នុង និងក្រៅប្រទេស។

ជាថ្មីម្តងទៀត ឯកឧត្តមបណ្ឌិតសភាចារ្យ ឧបនាយករដ្ឋមន្ត្រី ចូលរួមអបអរសាទរចំពោះសមិទ្ធផល នៃសាលារៀនជំនាន់ថ្មីនេះ និងសូមថ្លែងអំណរគុណចំពោះ គណៈគ្រប់គ្រង លោកគ្រូ អ្នកគ្រូ បុគ្គលិកសិក្សា ដៃគូពាក់ព័ន្ធនៃសាលារៀនជំនាន់ថ្មី វិទ្យាល័យព្រះស៊ីសុវត្ថិ ដែលបានលះបង់កម្លាំងកាយចិត្ត និងធនធានក្នុងការរៀបចំ "កម្មវិធីពិព័រណ៍ស្នាដៃសិស្សប្រចាំឆ្នាំ២០២៤" ឡើងដោយជោគជ័យនាពេលនេះ និងលើកទឹកចិត្តឱ្យអនុវត្តបន្តទៀត ដើម្បីលើកកម្ពស់គុណភាពសិក្សានៅកម្ពុជា៕