យោងតាមនគរបាលអ៊ីស្រាអែលបានឱ្យដឹងថា វីដេអូរបស់សាក្សី ដែលបានថត កាលពីថ្ងៃសុក្រ បាន​បង្ហាញកងកម្លាំងអ៊ីស្រាអែល កំពុងទាញយកសាកសពជាច្រើននាក់ចេញពីរថយន្ដ ដែល​ក្រឡាប់​ដែល​អ៊ីស្រាអែលនិយាយថា ជាខ្មាន់កាំភ្លើងប៉ាឡេស្ទីន បន្ទាប់ពីមានការបាញ់តគ្នា ក្នុង​អំឡុង​ពេលវាយឆ្មក់ចាប់ខ្លួន ក្នុងតំបន់កាន់កាប់វេសបែង ។ 

នៅក្នុងសេចក្ដីថ្លែងការណ៍របស់នគរបាល បាននិយាយថា បុរសពីរនាក់​មក​ពី​ក្រុម​សកម្ម​ប្រយុទ្ធ​អ៊ីស្លាម​ជីហាតប៉ាឡេស្ទីន បានបើកការបាញ់ប្រហារ លើកងទ័ពអ៊ីស្រាអែលក្នុងអំឡុងពេល ប៉ុន​ប៉ង​ឃាត់​ខ្លួនពួកគេមួយ នៅក្នុងក្រុងតូចកាល់គីលីយ៉ា(Qalqilya) ។

ទីភ្នាក់ងារព័ត៌មានផ្លូវការរបស់ប៉ាឡេស្ទីន WAFA បាននិយាយថា កងទ័ពអ៊ីស្រាអែល បានរារាំង​ក្រុម​គ្រូពេទ្យបឋមមូលដ្ឋានមិនឱ្យចូលទៅដល់រថយន្ដ និងយកសាកសពចេញ ។ មន្រ្ដី​សុខាភិបាល​ប៉ាឡេស្ទីន ក៍បានបញ្ជាក់ពីការស្លាប់បុរសពីរនាក់នេះផងដែរ។

មនុស្ស​ប្រមាណ៥៥០នាក់ ក្នុងនោះរួមមាន សកម្មប្រយុទ្ធជាច្រើននាក់ និងជនស៊ីវិល​ដែល​ឈរ​មើល​មួយ​ចំនួន ត្រូវបានសម្លាប់ដោយកងទ័ពអ៊ីស្រាអែល ក្នុងតំបន់វេស បែង ចាប់​តាំង​ពី​សង្រ្គាម​តំបន់​កាហ្សា បានផ្ទុះឡើងកាលពីថ្ងៃទី៧តុលាមក៕