ស៊ីហ្គេម៖ ស្ថានទូតសាធារណរដ្ឋប្រជាមានិតចិនប្រចាំនៅកម្ពុជាបានជូនដំណឹងថា ពហុកីឡដ្ឋានជាតិមរតកតេជោ បានឆ្លងកាត់ការត្រួតពិនិត្យដោយជោគជ័យកាលពីដើមសប្ដាហ៍កន្លងទៅ បន្ទាប់ពីគម្រោងទាំងមូលបានសាងសង់រួចរាល់ស្ទើរ ១០០% និងគ្រោងប្រគល់ឲ្យកម្ពុជាគ្រប់គ្រងនាពេលឆាប់ៗខាងមុខ។
តាមការបញ្ជាក់របស់ស្ថានទូតចិនប្រចាំនៅកម្ពុជា ពហុកីឡដ្ឋានជាតិមរតកតេជោដែលជាជំនួយរបស់រដ្ឋាភិបាលចិន បានឆ្លងកាត់ការត្រួតពិនិត្យដោយជោគជ័យកាលពីដើមសប្តាហ៍កន្លងទៅ ដែលនេះបានបង្ហាញពីអត្ថន័យដ៏សំខាន់នៃ «នាវាមិត្តភាព» រវាងចិន និងកម្ពុជា និងការផ្សាភ្ជាប់រវាងបេះដូងនៃប្រជាជនទាំងពីរ។ គម្រោងនេះមានទំហំផ្ទៃដីប្រមាណ ១៦.២២ហិកតា ទំហំសំណង់ប្រហែល ៨.២៤ម៉ឺនម៉ែត្រការ៉េ ហើយជាពហុកីឡដ្ឋានខ្នាតធំដែលអាចផ្ទុកអ្នកទស្សនាបានរហូតដល់ ៦ម៉ឺននាក់។ ពហុកីឡដ្ឋានថ្មីនេះអាចរៀបចំព្រឹត្តិការណ៍ប្រកួតកីឡាអន្តរជាតិ និងការប្រកួតកីឡាបាល់ទាត់អន្តរជាតិខ្នាតធំ និងអាចរៀបចំពិធីថ្នាក់ជាតិក៏ដូចជាព្រឹត្តិការណ៍ធំៗផ្សេងទៀតបាន ពិសេសសំណង់ប្រវត្តិសាស្ដ្រដ៏មហាសាលនេះនឹងក្លាយជាពហុកីឡដ្ឋានដ៏សំខាន់ សម្រាប់ការប្រកួតកីឡាស៊ីហ្គេមឆ្នាំ២០២៣ នៅកម្ពុជា។
តាមការអះអាងបន្ថែមលើបណ្ដាញសង្គមរបស់ស្ថានទូតចិនប្រចាំនៅកម្ពុជា បានចាត់ទុកពហុកីឡដ្ឋានជាតិមរតកតេជោគឺជាពហកីឡដ្ឋានមានទំហំធំបំផុត និងកម្រិតខ្ពស់បំផុតដែលជាជំនួយរបស់រដ្ឋាភិបាលចិននាបច្ចុប្បន្ន និងជាសមិទ្ធផលផ្លែផ្កានៃកិច្ចសហប្រតិបត្តិការក្រោមក្របខ័ណ្ឌការកសាងគំនិតផ្តួចផ្តើម «ខ្សែក្រវាត់ និងផ្លូវ» រវាងចិន-កម្ពុជា៕
អត្ថបទ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
