ប្រជាជនស៊ូដង់ជាង ១០លាននាក់ក្លាយជាជនភៀសខ្លួននៅក្នុងប្រទេសរបស់ពួកគេ ជា​ចំនួន​ដ៏​គួរ​ឱ្យ​ភ្ញាក់​ផ្អើលមួយដែលបានបញ្ចេញនៅថ្ងៃទិវាជនភៀសខ្លួនពិភពលោក ដែលបាន​ប្រារ​ព្ធ​ឡើង​កាល​ពីថ្ងៃទី២០ខែមិថុនាថ្មីៗនេះ។

តួលេខចុងក្រោយ ចេញផ្សាយដោយ​អង្គការ​ទេសន្តរប្រវេសន៍​អន្តរជាតិ​រប​ស់​អង្គការ​សហ​ប្រជាជាតិ​ក្នុងខែនេះបង្ហាញថា ប្រជាជនស៊ូដង់ជាង ១០លាននាក់​បាន​ភៀស​ខ្លួន​ចេញ​ពី​ការ​ប្រយុទ្ធ​នៅ​ក្នុងប្រទេសរបស់ពួកគេចាប់តាំងពី​ការ​ប៉ះទង្គិច​គ្នា​ដ៏ខ្លាំងក្លា​រវាង​កង​កម្លាំង​ប្រដាប់​អាវុធ​ស៊ូដង់ (SAF) និងកងកម្លាំងយោធាគាំទ្ររហ័សប៉ារ៉ា RSF បានផ្ទុះឡើងកាលពីថ្ងៃទី ១៥ ខែ​មេសា​ឆ្នាំ​មុន។

ជម្លោះប្រដាប់អាវុធបានផ្ទុះឡើងនៅក្នុងរដ្ឋធានី ខាទុំ (Khartoum) ហើយបន្ទាប់​មក​បាន​រីក​រាល​ដាល​ដល់​តំបន់ផ្សេងទៀត និងបន្តរហូតមកដល់សព្វថ្ងៃនេះ ដែលធ្វើឲ្យប្រទេស​អាហ្វ្រិក​ខាង​ជើង​មួយ​នេះ ធ្លាក់ក្នុងវិបត្តិជនភៀសខ្លួនយ៉ាងធ្ងន់ធ្ងរ។

ជនភៀស​ខ្លួនជាច្រើននាក់ដែលរត់គេចចេញពីតំបន់សង្គ្រាម បាននាំគ្នាទៅ​កាន់​កំពង់​ផែស៊ូ​ដង់​ដែល​គ្រប់​គ្រងដោយកងកម្លាំងប្រដាប់អាវុធស៊ូដង់ SAF នៅភាគឦសាន។ ទីក្រុងកំព​ង់​ផែ​នៅ​លើ​សមុទ្រ​ក្រហម ឥឡូវនេះមានមជ្ឈមណ្ឌលជនភៀសខ្លួនសរុបចំនួន ១១២ ដែលនីមួយ​ៗ​អាច​ផ្ទុក​មនុស្ស​ពី ២០០ ទៅ ៣០០ នាក់។ 

ស្រី្តម្នាក់ឈ្មោះ ម៉ាហាស៊ីន អាលី (Mahasin Ali) ដែលដើមឡើយរស់នៅក្នុងរដ្ឋធានីខាទុំ កំពុង​ស្នាក់​នៅ​ក្នុងជំរំតង់មួយនៅមជ្ឈមណ្ឌលជនភៀសខ្លួនជាមួយគ្រួសាររបស់អ្នកស្រី បាន​ប្រាប់​ទូរទស្សន៍កណ្តាលចិន (CCTV) ថា អ្នកស្រីគ្មានការងារធ្វើ ហើយគ្មានប្រភពចំណូល៕