ទោចក្រយាន៖ ក្រុមកីឡាករជម្រើសជាតិទោចក្រយានផ្នែកកង់គួកចំនួន ៣រូបបានបន្ដចូលរួមប្រកួតពានរង្វាន់អន្តរជាតិនៅអឺរ៉ុបមួយទៀតហើយ គឺការប្រកួតកង់គួកពានរង្វាន់ CCC Tour Grody Piastowskie UCI Europe Tour កម្រិត២.២ នៅប្រទេសប៉ូឡូញ។
លោក នូ ចំរើន អគ្គលេខាធិការសហព័ន្ធកីឡាទោចក្រយានកម្ពុជាបានឲ្យដឹងថា កីឡាករកម្ពុជាក្រោមការដឹកនាំរបស់គ្រូបង្វឹកលោក ខ្លូត ករណី បានធ្វើដំណើរទៅដល់ប្រទេសប៉ូឡូញកាលពីថ្ងៃទី១៨ ខែសីហាម្សិលមិញ ខណៈការប្រកួតនឹងធ្វើឡើងរយៈពេល ៤ថ្ងៃចាប់ពីថ្ងៃទី១៩ ដល់ថ្ងៃទី២២ ខែសីហា ឆ្នាំ២០២១ នេះ។ លោកបន្ដថា នេះគឺជាការប្រកួតលើកទី៤ របស់ក្រុមកីឡាករទោចក្រយានជម្រើសជាតិកម្ពុជា ក្រោយបោះជំរំហ្វឹកហាត់ជាង ២ខែនៅប្រទេសបារាំង ហើយក៏ជាការប្រកួតកម្រិតខ្ពស់ដើម្បីដកស្រង់បទពិសោធ និងពង្រឹងសមត្ថភាពត្រៀមការប្រកួតកីឡាស៊ីហ្គេមឆ្នាំ២០២១ នៅវៀតណាមដែលបានពន្យារពេលនៅឆ្នាំ២០២២ ផងដែរ។
គួរដឹងថា កីឡាករទោចក្រយានកម្ពុជាដែលបានបោះជំរំហ្វឹកហាត់នៅបារាំង និងកំពុងចូលរួមការប្រកួតជាបន្ដបន្ទាប់នៅអឺរ៉ុបរួមមានកីឡាករ គឹម ចាន់ធូ, សាន ណាម៉ា និងកីឡាករ សាន ណាម៉ាវ។ សម្រាប់បេសកកម្មហ្វឹកហាត់ក្រៅស្រុកត្រៀមស៊ីហ្គេមនេះ គឺទទួលបានការសម្របសម្រួល និងផ្គត់ផ្គង់ពីសមាគមខ្មែរកីឡាទោចក្រយាននៅប្រទេសបារាំង និងទទួលបានការគាំទ្រពេញទំហឹងពីឯកឧត្តម ប៉ាន សូរស័ក្ដិ រដ្ឋមន្ដ្រីក្រសួងពាណិជ្ជកម្ម និងជាប្រធានសហព័ន្ធកីឡាទោចក្រយានកម្ពុជា៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
