មន្រ្តីជាន់ខ្ពស់ក្រសួងពាណិជ្ជកម្មកម្ពុជា បានឲ្យដឹងថា គិតចាប់ពីកម្ពុជាចុះហត្ថលេខាលើអនុស្សារណៈ នៃការ​យោគយល់​ជាមួយ​ក្រុមហ៊ុនអនឡាញខ្នាតយក្ស អាលីបាបា កាលពីខែតុលា ឆ្នាំ២០២៣ ដើម្បី​ដាក់​លក់​ដោយត្រង់នូវផលិតផលកម្ពុជាលើទីផ្សារចិន រហូតមកដល់ពេលនេះ មានចំនួនប្រមាណ ២៦,០០០ ផលិតផល។

នៅក្នុងកិច្ចសម្ភាសន៍កម្មវិធីសេដ្ឋកិច្ចរបស់ទូរទស្សន៍ព័ត៌មាន ប៊ីធីវី ឯកឧត្តម ប៉ែន សុវិជាតិ រដ្ឋ​លេខាធិការ និងជាអ្នកនាំពាក្យក្រសួងពាណិជ្ជកម្ម បានមានប្រសាសន៍ថា សព្វថ្ងៃនេះ ផលិត​ផល​កម្ពុជា​កាន់​តែច្រើនឡើងបានដាក់តាំងលក់លើថ្នាលពាណិជ្ជកម្មតាមប្រព័ន្ធអេឡិចត្រូនិកលើ អាលី​បាបា មានដូចជា ទំនិញប្រភេទកសិកម្ម ឧស្សាហកម្មស្រាល សម្លៀកបំពាក់ ស្បែកជើង និង​សិប្បកម្ម។ល។

ក្នុងកិច្ចសម្ភាសន៍ដដែលនោះ ឯកឧត្តម បានបញ្ជាក់ថា គ្រប់ផលិត​ផលរ​បស់​កម្ពុជា​ទំរាំ​បាន​ចូល​ទៅ​ដល់​ទីផ្សារ អាលីបាបា គេបានតេស្ត និងសាកល្បងទំនិញខ្មែររួចទៅហើយ ដោយមិ​ន​ឲ្យ​ម្ចាស់​ទំនិញ​បាន​ដឹងខ្លួននោះទេ ដូចជា អង្ករ ផ្លែមៀន ទុរេន និងគ្រាប់ស្វាយចន្ទីរជាដើម មុនសម្រេច​ឲ្យដាក់​លក់។ ឯកឧត្តមបានបន្ថែមថា មុនដំបូងផលិតផលខ្មែរចំនួនប្រមាណ ១,៦០០មុខ​ទំនិញ​ប៉ុណ្ណោះ ដែលដាក់តាំងលក់ ប៉ុន្តែរហូតមកដល់ពេលនេះ បានកើនដល់ចំនួនជាង ២៦,០០០​ផលិត​ផល​ ដោយមាន អ្នកផ្គត់ផ្គង់ក្នុងការលក់ (Supplier) ចំនួនជាង ៣,០០០ ។ ទន្ទឹមនេះ ឯកឧត្តម ក៏បានលើកឡើងនូវបញ្ហាឧសគ្គមួយចំនួនដែរ ក្នុងការដាក់លក់​ទំនិញ​នានា​លើ​ផ្សារ​មួយ​នេះ យ៉ាងដូច្នេះថា

កាលពីថ្ងៃទី២៧ ខែឧសភា ឆ្នាំ២០២៤កន្លងទៅ ក្រសួងពាណិជ្ជកម្មកម្ពុជា បានរៀប​ចំ​សិក្ខា​សាលា​ស្តីពី “លើសពីទីផ្សារកម្ពុជា៖ ការនាំយកផលិតផល​កម្ពុ​ជា​ទៅ​កាន់​ទីផ្សារ​អន្តរជាតិ តាមរយៈ​ក្រុមហ៊ុន Alibaba.com" ក្នុងគោលបំណងផ្សព្វផ្សាយព័ត៌មាននានាដែលពាក់ព័ន្ធ និង​ដើម្បី​ផ្សព្វផ្សាយបន្ថែមដល់វិស័យឯកជន និងធុរជនកម្ពុជា សម្រាប់ជា​ការ​ត្រៀមខ្លួន​និង​គិតគូរ​ក្នុង​ការ​ផ្គត់ផ្គង់​ផលិតផលដែលអតិថិជនកំពុងត្រូវការ។ សូមបញ្ជាក់ថា បច្ចុប្បន្នផ្សារអនឡាញ អាលី​បាបា មានអតិថិជនសរុបចំនួនប្រមាណ ១,៣០០លាននាក់ នៅទូទាំងសាកលលោក៕អត្ថបទ ឈិត បូរ៉ាវី