បច្ចុប្បន្នសិស្សានុសិស្សកម្ពុជាមួយចំនួន ដែលសិក្សានៅមជ្ឈមណ្ឌលសិក្សាទំនើប កំពុង​អភិវឌ្ឍន៍​ខ្លួន​ជា​ខ្លាំង ទៅលើមុខវិជ្ជាSTEM។ ក្នុងនោះពួកគេ ក៏កំពុង​សិក្សាជា​ប្រចាំលើ​មុខ​វិជ្ជា​មួយ​ឈ្មោះ​ថា​ Robot Think Robotic ជាមុខវិជ្ជាដែលនាំចូលមកពីប្រទេសអាមេរិក។ ការសិក្សា​លើ​មុខ​វិជ្ជា​នេះ គឺអនុវត្តដូចគ្នា ទៅការសិក្សារបស់កុមារនៅ សហរដ្ឋអាមេរិក ក៏ដូចជាប្រទេសដទៃ ដែល​សិក្សា​នៅមជ្ឈមណ្ឌលសិក្សាទំនើបផងដែរ។ នេះជាការលើកឡើងរបស់ លោក ប៊ី លីហ៊ួ ជាអ្នក​គ្រប់​គ្រង​មជ្ឈមណ្ឌលសិក្សាទំនើប ព្រះនរោត្តម។

មជ្ឈមណ្ឌលសិក្សាទំនើប ជាគ្រឹះស្ថានសិក្សាដែលផ្ដល់ការសិក្សាពេញមួយថ្ងៃ។ ការសិក្សា គឺ​អនុវត្ត​ទៅ​តាមកម្មវិធីសិក្សាជាតិ ១វេន និងអនុវត្តកម្មវិធីសិក្សាទំនើប ១វេន។ ការសិក្សា​បែប​ទំនើប​នេះ រាប់បញ្ចូលទាំងការសិក្សាភាសាចិន ភាសាអង់គ្លេស កំព្យូទ័រ ក៏ដូចជាថ្នាក់​រ៉ូបូត​ផង​ដែរ​។ សម្រាប់ការសិក្សារ៉ូបូតនេះ សាលាមានកម្មវិធីសិក្សា Robot Think Robotic ជាកម្ម​វិធី​សិក្សា​ផ្តោត​សំខាន់​លើ មុខវិជ្ជា STEM មកពីប្រទេសអាមេរិក។ នេះជាការបញ្ជាក់របស់លោក ប៊ី លីហួ ជា​អ្នក​គ្រប់គ្រងមជ្ឈមណ្ឌលសិក្សាទំនើប ព្រះនរោត្តម។

លោក ប៊ី លីហ៊ួ លើកឡើងថា ការរៀននិងបង្រៀន Robot Think Robotic នៅគ្រប់​មជ្ឈ​មណ្ឌល​សិក្សា​ទំនើប​នៅកម្ពុជា គឺអនុវត្តដូចគ្នាទៅនឹងការរៀន និងបង្រៀន របស់កុមារនៅប្រទេសអាមេរិក ក៏​ដូ​​ចជាកុមារនៅប្រទេសដទៃផងដែរ។ ការសិក្សា​កំពុង​អនុវត្ត​សម្រាប់​សិស្ស​គ្រប់​កម្រិត​ថ្នាក់​ចាប់​ពីថ្នាក់ទី ១ឡើងទៅ។ ការសិក្សាគឺអនុវត្តជាភាសាអង់គ្លេស ទៅតាមមេរៀន ជាមួយ​នឹង​សម្ភារ​ដែល​នាំ​ចូលពីប្រទេស អាមេរិក ផងដែរ។ លើសពីនេះ គ្រូបង្រៀនលើមុខវិជ្ជានេះ សុទ្ធតែ​ត្រូវ​បាន​ទទួល​ការ​បណ្ដុះបណ្ដាល ពីអ្នកជំនាញបរទេសជាមុន។

សម្រាប់កុមារថ្នាក់ទី ៦ ដែលកំពុងសិក្សាលើមុខវិជ្ជា រ៉ូបូតនៅព្រឹកនេះ កំពុង​អនុវត្ត​យ៉ាង​មមា​ញឹក​ក្នុង​ការដំឡើងនិងបញ្ជាគ្រឿងចក្រ។ ពួកគេពេញចិត្ត ទៅលើមុខវិជ្ជា រ៉ូបូត នេះ ដោយពួក​គេ​បាន​សិក្សា​រយៈពេល ៣ឆ្នាំមកហើយ។ ពួកគេមានសមត្ថភាព អាចដំឡើងបង្កើត និងបញ្ជា​គ្រឿង​ចក្រ​មួយ​ចំនួន រួមមានទាំង Excavator, Helicopter ជាដើម។ ពួកគេម្នាក់ៗបង្ហាញគោលជំហរ នឹង​បន្ត​សិក្សា​លើមុខវិជ្ជា តិចណូឡូជី មួយនេះ សម្រាប់ពេលអនាគត។

បច្ចុប្បន្នមជ្ឈមណ្ឌលសិក្សាទំនើប មានចំនួន ៧។ ៦សាលាស្ថិតនៅរាជធានីភ្នំពេញ និង១ សាលា​ស្ថិត​នៅ​ខេត្តកំពង់ឆ្នាំង។ មជ្ឈមណ្ឌលសិក្សាទំនើប ២ទីតាំង ផ្សេងទៀត ក៏គ្រោងបើក​ដំណើរ​កា​រ​នៅ​ឆ្នាំ​សិក្សាក្រោយផងដែរ។ ការសិក្សានៅមជ្ឈមណ្ឌលសិក្សាទំនើប ជាការសិក្សាបង់ថ្លៃ។ សិស្ស​ត្រូវ​បង់​ថវិកាប្រមាណ ៥០០ ទៅ ៦០០ដុល្លារ៕ អត្ថបទ៖ គឹមហុក