អាហ្វហ្គានីស្ថាន៖ សាក្សីបាននិយាយថា មនុស្សយ៉ាងហោចណាស់ ៣នាក់ត្រូវបានសម្លាប់នៅក្នុងការតវ៉ាប្រឆាំងពួកតាលីបង់នៅទីក្រុងចាឡាឡាបាដ (Jalalabad) ប្រទេសអាហ្វហ្គានីស្ថានកាលពីថ្ងៃពុធ ទី១៨ ខែសីហា ខណៈក្រុមជ្រុលនិយមនេះបានរំកិលទៅរកការពង្រឹងអំណាច ហើយបណ្ដាប្រទេសលោកខាងលិចបានបង្កើនការជម្លៀស ចេញពីអាកាសយានដ្ឋានកាប៊ុលដែលកំពុងច្របូកច្របល់។
ចម្ងាយប្រហែល ១៥០គីឡូម៉ែត្រខាងកើតទីក្រុងចាឡាឡាបាដ ការតវ៉ាប្រឆាំងនឹងពួកតាលីបង់បានផ្តល់ការសាកល្បងដំបូងនៃការសន្យារបស់ក្រុមនេះ អំពីការគ្រប់គ្រងដោយសន្តិភាពចំពោះប្រជាជនអាហ្វហ្គានីស្ថាន ដែលខ្លួនបាននិយាយក្នុងសន្និសីទសារព័ត៌មានលើកដំបូង។ មនុស្សរាប់ពាន់នាក់កំពុងព្យាយាមភៀសខ្លួនចេញពីប្រទេស ដោយភ័យខ្លាចការវិលត្រឡប់ទៅរកច្បាប់អ៊ីស្លាមដ៏តឹងរ៉ឹង ដែលបានកំណត់ក្នុងអំឡុងរបបគ្រប់គ្រងរបស់ពួកតាលីបង់ ដែលបានបញ្ចប់កាលពី ២០ឆ្នាំមុន។
សាក្សីបាននិយាយថា សមាជិកប្រដាប់អាវុធរបស់ពួកតាលីបង់បានរារាំងមនុស្ស មិនឱ្យចូលទៅក្នុងបរិវេណអាកាសយានដ្ឋាន រួមទាំងអ្នកដែលមានឯកសារចាំបាច់ក្នុងការធ្វើដំណើរ។ មន្ត្រីតាលីបង់ម្នាក់បាននិយាយថា មេបញ្ជាការ និងទាហានបានបាញ់ឡើងលើអាកាស ដើម្បីបំបែកហ្វូងមនុស្សនៅខាងក្រៅអាកាសយានដ្ឋានក្រុងកាប៊ុល ប៉ុន្តែបានប្រាប់សារព័ត៌មាន Reuters ថា យើងគ្មានចេតនាធ្វើឱ្យនរណាម្នាក់រងរបួសឡើយ៕
អត្ថបទ៖ សុខមាន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
