នាយករដ្ឋមន្ត្រីអ៊ីស្រាអែល លោក បេនចាមីន ណេតាន់យ៉ាហ៊ូ បានការពារការសម្រេចចិត្តរបស់ខ្លួន ក្នុងការផ្សព្វផ្សាយជាសាធារណៈអំពីការពន្យារពេលក្នុងការផ្គត់ផ្គង់អាវុធពីសហរដ្ឋអាមេរិក ដោយនិយាយថា ការពិភាក្សាឯកជនជាច្រើនខែ មិនទទួលបានលទ្ធផលអ្វីទាន់តែសោះ។

នៅពេលចាប់ផ្តើមកិច្ចប្រជុំគណៈរដ្ឋមន្ត្រីមួយ កាលពីថ្ងៃអាទិត្យ លោក ណេតាន់យ៉ាហ៊ូ បាននិយាយថា៖« បន្ទាប់ពីការមិនមានការផ្លាស់ប្តូរនៅក្នុងស្ថានភាពនេះ អស់រយៈពេលជាច្រើនខែ ខ្ញុំបានសម្រេចចិត្តបញ្ចេញមតិជាសាធារណៈ។ ខ្ញុំបានធ្វើនេះ ដោយផ្អែកលើបទពិសោធជាច្រើនឆ្នាំ ហើយដឹងថា ជំហាននេះ មានសារៈសំខាន់ក្នុងការធ្វើឲ្យសាធារណជន យល់ពីបញ្ហានេះកាន់តែច្បាស់»។

លោក ណេតាន់យ៉ាហ៊ូ បានអះអាងកាលពីថ្ងៃអង្គារថា រដ្ឋបាលលោក បៃដិន កំពុង«ដកហូតអាវុធ» នៅក្នុងវីដេអូដែលបានបង្ហោះទៅកាន់បណ្តាញ X ដោយអះអាងថា លោក រដ្ឋមន្ត្រីការបរទេស អង់តូនី ប៊ីលន   ខិន (Antony Blinken) «បានធានាចំពោះខ្ញុំថា រដ្ឋបាលនេះ កំពុងធ្វើការទាំងយប់ទាំងថ្ងៃ ដើម្បីបញ្ចប់ដំណើរការរាំងស្ទះទាំងនេះ»។

ជាការឆ្លើយតប បេសកជនអាមេរិកលោក Amos Hochstein បានប្រាប់លោក ណេតាន់យ៉ាហ៊ូថា ការអត្ថាធិប្បាយរបស់ខ្លួនគឺ «គ្មានផលិតភាព» និង «សំខាន់ជាងនេះទៅទៀត គឺមិនពិតទាំងស្រុង»។

ខណៈនេះ គឺមិនមែនជាលើកទី១ទេ ដែលលោក ណេតាន់យ៉ាហ៊ូ បាននិយាយរិះគន់រដ្ឋបាលលោក បៃដិន ជាសាធារណៈ ក្នុងដំណើរនៃសង្រ្គាមអ៊ីស្រាអែល និងក្រុមហាម៉ាស ជម្លោះនេះ បានកើតឡើង នៅពេលដែលហានិភ័យជុំវិញសង្រ្គាមនៅហ្កាហ្សា និងលទ្ធភាពជម្លោះរវាងអ៊ីស្រាអែល និងក្រុមហេសបូឡា នៅតែមានកម្រិតខ្ពស់។