អាហ្វហ្គានីស្ថាន៖ ជនជាតិអាហ្វហ្គានីស្ថានរាប់រយនាក់ដែលខ្វះឯកសារ ឬជាប់សន្យាជាមួយជើងហោះហើរបានបន្តប្រមូលផ្តុំគ្នា នៅអាកាសយានដ្ឋានក្រុងកាប៊ុលកាលពីយប់ថ្ងៃពុធ។ ហ្វូងមនុស្សដែលបានប្រមូលផ្ដុំគ្នាយ៉ាងកកកុញនៅបរិវេណខាងក្រៅ បានព្យាយាមរុលទៅមុខរាល់ពេលដែលកងកម្លាំងតាលីបង់បើកទ្វារ ដែលធ្វើឱ្យក្រុមតាលីបង់បាញ់ព្រមានដើម្បីជំរុញមនុស្សឱ្យត្រលប់ទៅវិញ។
យុទ្ធជន និងប៉ុស្តិ៍ត្រួតពិនិត្យរបស់ពួកតាលីបង់ បានឡោមព័ទ្ធអាកាសយានដ្ឋានកាលពីថ្ងៃពុធ ដែលជាការរារាំងជនជាតិអាហ្វហ្គានីដែលភ័យខ្លាចថា ការងាររបស់ពួកគេជាមួយបស្ចិមប្រទេស ធ្វើឱ្យពួកគេក្លាយជាគោលដៅចម្បងរបស់ក្រុមបះបោរ។ ជនជាតិអាហ្វហ្គានីស្ថានដែលស្ថិតក្នុងគ្រោះថ្នាក់ដោយសារពួកតាលីបង់ ចំពោះការងាររបស់ពួកគេជាមួយកងកម្លាំងអាមេរិក និងអង្គការនានារបស់អាមេរិក ក៏បានអង្វរដល់រដ្ឋបាលលោកប្រធានាធិបតីអាមេរិក Joe Biden ផងដែរសុំឲ្យបន្ធូរបន្ថយដល់ដំណើរការ រៀបចំឯកសារលិខិតស្នាមដ៏លម្អិត ដែលពួកគេនិយាយថា គំរាមកំហែងដល់ជនជាតិអាហ្វហ្គានីស្ថានងាយរងគ្រោះរាប់ម៉ឺននាក់។
មន្ទីរបញ្ចកោណបាននិយាយកាលពីថ្ងៃពុធថា ក្រុមមន្ត្រីយោធាជាន់ខ្ពស់អាមេរិក រួមទាំងឧត្ដមនាវីឯក Peter Vasely កំពុងនិយាយជាមួយក្រុមមេបញ្ជាការតាលីបង់នៅក្នុងរដ្ឋធានីអំពីប៉ុស្តិ៍ត្រួតពិនិត្យ និងបម្រាមគោចររបស់តាលីបង់ដែលបានកំណត់ចំនួនជនជាតិអាមេរិក និងអាហ្វហ្គានីស្ថានដែលអាចចូលទៅក្នុងអាកាសយានដ្ឋានបាន៕
អត្ថបទ៖ សុខមាន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
